Oleğ Matıçin bilğeläp uzğança, seminarda qatnaşu öçen Tatarstan başqalasına Xalıqara studentlar sportı federaçiyaseneñ barlıq departament citäqçeläre cıelğan

(Qazan, 17 ğıynvar, “Tatar-inform”, Ğölnar Ğarifullina). Büğen 2013 nçe elda Qazanda XXVII Bötendönya cäyğe Universiadanı uzdıru mäsäläläre buença üz eşen başlap cibärğän seminarda qatnaşuçılarnı Tatarstan Prezidentı, respubliqa citäqçeleğe isemennän TR Prezidentınıñ tışqı elemtälär departamentı direqtorı – TR Prezidentınıñ xalıqara mäsälälär buença yardämçese İsqändär Möflixanov sälamläde. “Yulnıñ zur öleşe ütelde, qülämle eş başqarıldı, sport obeqtlarınıñ qiñ qolaçlı tözeleşe bara, urnaştıru, tuqlandıru, transport belän täeminat mäsäläläre uñışlı ğına xäl itelä”, - dip belderde İsqändär Möflixanov. Ul qısqaça Universiadağa äzerleq qısalarında bıltır uzdırılğan çaralarnı sanap ütte häm ağımdağı elnıñ citdi häm xalıqara däräcädäğe möhim çaralarğa bay bulaçağın assızıqladı. “Mondıy seminarlar uzdıru äzerleq däräcäsen tağın da qamilläştererğä yardäm itäçäq. Seminarnıñ ähämiyaten maqsimal töstä añlap, anı täcribädä qullanu möhim. Bu seminar Qazannıñ Universiada xucabiqäse buluına büğenğe qöndä ni däräcädä äzer buluın qürsätäçäq”, - dip bilğeläp uzdı departament direqtorı. Rossiya studentlar sport berleğe prezidentı Oleğ Matıçin bilğeläp uzğança, seminarda qatnaşu öçen Tatarstan başqalasına Xalıqara studentlar sportı federaçiyaseneñ barlıq departament citäqçeläre cıelğan. “Min ışanam, alarnıñ eş täcribäse XXVII Universiadanı oeştıru qomitetına Bötendönya studentlar uennarı tarixına tağın da tiränräq qererğä, äzerleqneñ här mizğele niqadär möhim buluın añlarğa yardäm itäçäq. Aldağı Universiadalar täcribäsenä tayanu zur rol uynıy”, - dip sanıy FISU nıñ berençe viçe-prezidentı. “Rossiyaneñ Qazan yözendä Universiadanı qabul itüe – möhim proeqt. Ul bu proçessqa distä meñnärçä yaşlärne cälep itärğä bulışa, eşneñ här etabına centeqläp äzerlänü zarur, urtaq tırışlıq aşa uñışlarğa ireşerbez”, - dip belderde Oleğ Matıçin. FISU ğeneral seqretare Eriq Seyntrond doqladında Xalıqara studentlar sportı federaçiyase tarixına, maqsatlarğa, eşçänleq törläre qebeq mäsälälärğä tuqtaldı häm 2011 nçe elda Şenjendä uzğan Universiada qüreneşlärennän ğıybarät bulğan filmnı täqdim itte. “FISU Başqarma qomitetı äğzaları: urnaştıru, xezmätlär häm servis” temasına FISU Prezidentı apparatı citäqçese X. Xanqart çığış yasadı. FISU mediçina qomissiyase räise Lorens Rinq “Mediçina yardäme belän täeminat häm dopinğ-qontrol” turında söyläde. İrtäğä “Universiada personalı”, “MMÇ häm televidenie”, “Risqlar belän idarä itü häm iminiyatläşterü”, “Universiada avılı”, “Qurqınıçsızlıqnı täemin itü”, 19 nçı ğıynvar qönne “Sport yarışları reğlamentı”, “Mäğlümati texnoloğiyalär”, “Sport zayavqası”, “Xalıqara mönäsäbätlär” qebeq temalarğa doqladlar yañğırayaçaq häm seminarğa yomğaq yasalaçaq. “Qazan 2013” Başqarma direqçiyase xezmätqärlärenä täcribä urtaqlaşu öçen Qazanğa qilğän räsmi deleğaçiya sostavında Cäyğe Universiadalar direqtorı Marq Vandenplas, Qışqı Universiadalar direqtorı M. Avğustin, xalıqara texniq qomissiya räise Djon Varnoq, mäğarif proğrammaları häm üseş buença direqtor Qol Ğjeşolay häm başqalar bar.