Avstriyaneñ İnsbruq şähärendä stajirovqa uzuçı “Qazan 2013” volonterları inde berniçä qön üzläreneñ funqçional yunäleşläre buença eşli

(Qazan, 18 ğıynvar, «Tatar-inform»). “Qazan 2013” volonterları Avstriyaneñ İnsbruq şähärendä I qışqı yaşüsmerlär Olipiya uennarınıñ Rossiya cıelma qomandası ştabında Rossiya Olimpiya qomitetınıñ ğeneral seqretare, Rossiya Däülät Duması deputatı, Tatarstannıñ eleqqeğe yaşlär eşläre, sport häm turistlıq ministrı Marat Bariev belän oçraşıp, İnsbruqta eşläüneñ täüğe qönnäre xaqında söyläde. 13 ğıynvarda I qışqı yaşüsmerlär Olimpiya uennarı başqalasında Olimpiya utı qabındı, yarışlarnıñ berniçä qöne häm täüğe ciñülär inde artta qaldı. Avstriyaneñ İnsbruq şähärendä stajirovqa uzuçı “Qazan 2013” volonterları inde berniçä qön üzläreneñ funqçional yunäleşläre buença eşli, 2013 elda Qazanda uzaçaq XXVII Bötendönya cäyğe universiadası aldınnan zur täcribä tuplıy. Büğen Marat Bariev Rossiya cıelma qomandası ştabında “Qazan 2013” volonterları belän oçraşıp, alarnıñ stajirovqası belän qızıqsındı. “Qazan 2013” Başqarma direqçiyase” qommerçiyale bulmağan avtonom oeşmasınıñ volonterlar reqrutinğı büleğe başlığı Tatyana Niqulina İnsbruqtağı obeqtlarnıñ bersendä mädäni-belem birü proğramması qısalarında event-menedjer vazifasın başqara. Proğramma Olimpiya qıymmätlären qabul itü, ğamälğä aşıru, çağıldıruğa yunälderelğän häm 5 ideyağä (olimpizm, qüneqmälärne üsterü, sälamät yaşäü räveşe, soçial cavaplılıq häm ğäüdäläneş) niğezlänğän. Olimpiya uennarı barışında 20 dän artıq çara uzaçaq, alar mädäniyatara aralaşu, üseş, qüñel açu, belem alu häm tanışu öçen uniqal mäydançıq xasil itä. “Min eşemnän ğayat zur qanäğatlänü alam, - dide T.Niqulina. – Biredä sportnıñ yaş yoldızları öçen böten närsä (dönyanıñ ataqlı sportçıları belän oçraşulardan başlap Uennarnıñ simvoliqası töşerelğän eqsqlyuziv suvenir produqçiyağä qadär) qaralğan. Bez qunaqlarnı terqibez, proğramma xaqında söylibez, tärcemä itüdä yardäm qürsätäbez”. İnsbruqtağı I qışqı yaşüsmerlär Olipiya uennarında barlığı biş volonter stajirovqa uza: alarnıñ iqese Rossiya cıelma qomandasınıñ attaşeları sıyfatında, tağın iqese Uennarnıñ media-üzäqlärendä eşli, dip xäbär itä “Qazan 2013” Başqarma direqçiyase” qommerçiyale bulmağan avtonom oeşması media departamentı.