Tatarstan Prezidentı Lodz voevodalığı deleğaçiyase belän oçraşu barışında änä şundıy fiqer belderde

(Qazan, 19 ğıynvar, «Tatar-inform»). Tatarstan Respubliqası häm Polşa Respubliqasınıñ Lodz voevodalığına eşquarlıq, mädäniyat, belem birü ölqäsendä xezmättäşleqne üstererğä häm urtaq proeqtlarnı ğamälğä aşırırğa qiräq. Büğen Tatarstan Prezidentı Röstäm Miñnexanov Lodz voevodası Yolanta Xelminsqaya xanım citäqçeleğendäğe Lodz voevodalığı deleğaçiyase belän oçraşu barışında änä şundıy fiqer belderde. Qazan Qremlendä uzğan oçraşuda şulay uq respubliqa Xöqümäte viçe-premerı Zilä Välieva, Tatarstan sänäğat häm säüdä ministrı Ravil Zaripov, TR Prezidentınıñ Tışqı elemtälär departamentı direqtorı – TR Prezidentı yardämçese İsqändär Möflixanov, TR İnvestiçion üseş ağentlığı citäqçese Linar Yaqupov, “Qazanorğsintez” AAC ğeneral direqtorı Leonid Alexin, “Tatnefteximinvest-xoldinğ” AAC ğeneral direqtorı Rafinat Yarullin qatnaştı. Lodz voevodalığı deleğaçiyase Tatarstanğa dürt qönleq vizit belän qilde. Qunaqlar IT-parqta bulıp, respubliqa Däülät Sovetı Räise Färit Möxämmätşin belän oçraştı inde. Säfär proğrammasında şulay uq Qazani federal universitetı, “Alabuğa” maxsus iqtisadi zonası, “QAMAZ” AAC häm “Master” Qama industrial parqında bulu qaralğan. Deleğçiya sostavına Polşanıñ berniçä qompaniyase väqilläre qerä. Qazan Qremlendäğe büğenğe oçraşu barışında Röstäm Miñnexanov deleğaçiyaneñ vizitı Tatarstan häm Lodz voevodalığı arasındağı säüdä-iqtisadi mönäsäbätlär, fänni-belem birü, mädäni elemtälärğä yaña etärğeç biräçäğenä ışanıç belderde. “İllär däräcäsendä ğenä tüğel, subeqtlar däräcäsendä dä xezmättäşleq itärğä qiräq”, - dip belderde Tatarstan Prezidentı. Ul soñğı vaqıtta Tatarstan häm Polşa arasındağı elemtälärneñ aqtivlaşuın isqärtte. “Uzğan el Polşa ilçese iqe märtäbä Qazanda buldı, min deqabr aenda Ğdansqiğa säfär qıldım. Bezdä “Aq börqet” Polşa cämğıyate, Polşa qatoliqlar mäxälläse, polyaq telendä belem birüçe mäqtäp eşläp qilä”, - dide Röstäm Miñnexanov. “Bez Lodz voevodalığı belän 1996 eldan birle elemtädä torabız, Sezneñ vizit mönäsäbätlärne yañartıp cibärer dip ömetlänäm, - dide TR Prezidentı. – Bezğä eşquarlıq, belem birü, mädäniyat, sport ölqäsendä ğamäli proeqtlar tabarğa qiräq”. Bu xaqta TR Prezidentınıñ matbuğat xezmäte xäbär itä.