Bu ay – Allahı Täğaläneñ söeqle räsüle, Axırzaman päyğambäre Möxämmäd (s.ğ.v) dönyağa qilğän ay. Şuña qürä Rabiğel-äüväl İslamda ähämiyatle aylarnıñ berse sanala

(Qazan, 25 ğıynvar, “Tatar-inform). Tatarstan möftie İldus xäzrät Fäizov Rabiğel-äüväl (Mäülid) ae başlanu uñaennan möräcäğat belän çıqtı. “Allah Sübxänähü vä Täğaläğä maqtaularıbız bulsa ide! Ässälamü ğaläyqüm vä raxmätullaxi vä bäräqatüh! Möxtäräm din qardäşlärebez! Tatarstan möselmannarı Diniya näzaräte häm şäxsän üz isememnän barlıq möselmannarnı da Rabiğel-äüväl ae başlanuı belän ixlastan qotlıym! Bu ay – Allahı Täğaläneñ söeqle räsüle, Axırzaman päyğambäre Möxämmäd (s.ğ.v) dönyağa qilğän ay. Şuña qürä Rabiğel-äüväl İslamda ähämiyatle aylarnıñ berse sanala. Qorän aşları, dini mäcleslär ütqärü, berğä cıelıp Päyğambärebezğä salavatlar äytü, doğa qılu – bu aynıñ qürqäm ğadätlärennän. Tatarstan mäçetlärendä, möselman uqu yortlarında, möselmannar yaşäğän här yortta bu matur dini yolalar ğasırlar bue saqlanıp qilä. Rabiğel-äüväl aenıñ moğcizası –Päyğambärebezneñ (s.ğ.v) tuğan qöne. Anı islamda Mäülid dip atıylar. Äleğe qön möselmannarnı izğe, iğeleqle ğamällär qılırğa çaqıra. Päyğambärebezneñ (s.ğ.v) tormış-yaşäeşe här möselman öçen ölğe, ürnäq bulıp tora. Ul üzeneñ qılğan ğamälläre belän möselmannarnı sabırlıqqa, ixlaslıqqa, ruxi qıymmätlärne saqlarğa çaqırdı. Anıñ tormış yulı, här ğamäle – yaşäeşebezneñ niğeze. Päyğambärebezneñ (s.ğ.v) här sulışı, här süze möselmannar öçen aerım mäğnäğä, zur qıymmätqä iya. Ul quşqannarnı ütäp, bez ruxıbıznı ğına çistartıp qalmıybız, ä äxlaq yuğarılığına ireşäbez, iğeleqle ğamällärebezne arttırabız. Barçabızğa da Qıyamät qönendä Allahı Söbxänähü vä Täğaläneñ räxim-şäfqatenä häm Päyğambärebezneñ (s.ğ.v) şäfäğatenä ireşerğä nasıyp bulsa ide. Allahı Söbxänähü vä Täğalä härbarçabızğa da iman nıqlığı, iqe dönya bäxete nasıyp äyläsen ide. Barlıq izğe eşlärebez häm başlanğıçlarıbız da Allahı Täğaläneñ räxim-şäfqate belän eşlänsä ide”, - dielä möräcäğattä.