13-22 ğıynvar qönnärendä Avstriyaneñ İnsbruq şähärendä uzğan Uennarda Tatarstannan 5 xoqqeyçı qatnaştı

(Qazan, 26 ğıynvar, «Tatar-inform», Mariya Qiryuxina). Büğen Qazanğa berençe qışqı yaşüsmerlär Olimpiya uennarında Rossiya cıelma qomandası sostavına qerğän xoqqeyçılar qilde. İsqärtep ütäbez, 13-22 ğıynvar qönnärendä Avstriyaneñ İnsbruq şähärendä uzğan Uennarda Tatarstannan 5 xoqqeyçı qatnaştı. Äleğe yarışlarda xoqqey buença Rossiya yaşüsmerlär cıelma qomandası, finalda fin xoqqeyçılarına ottırıp, iqençe urınğa laeq buldı. Maqsim Lazarev, Eduard Nasıybullin, Rostislav Osipov, Aleqsandr Protapoviç häm Evğeniy Sveçniqovnı Qazan voqzalında biq cılı qarşı aldılar. Alarnı qarşılarğa ostazlarınnan tış, äti-äniläre, äbi-babayları da qilğän ide. Eduard Nasıybullin berençe urınnı alırğa teläqläre biq zur bulsa da, moña ireşä almauların belderde. “Barısı da yaxşı buldı. Ämma şulay qilep çıqtı inde, final matçında ciñüçene bullitlar buença açıqlarğa turı qilde, ä bullitlar – härvaqıtta da lotereya ul. Häm bez bu lotereyada ottırdıq, - dide xoqqeyçı. – Bez Qanada häm Ameriqa xoqqeyçıları belän uynau qatlaulı bulaçağın belsäq tä, finnar da üzlären biq laeqlı qürsätte”. Evğeniy Sveçniqovnıñ da turnirda alğan täesirläre yaxşı. “Äleğä bu minem sport qarerasındağı iñ qızıqlı çempionat. Ämma bezneñ barısı da alda äle. Qayçan da bulsa ölqännär Olimpiada uennarında qatnaşu öçen tırışaçaqbız”, - dip assızıqladı xoqqeyçı. Süz uñaennan, Evğeniy Soçidağı Olimpiadada qatnaşu mömqinleğen dä istän çığarmıy. Ul dörestän dä xaqlı bulıp çıqtı, çönqi inde büğen üq yaş xoqqeyçılar ğadäti qüneğülär ütqäräçäq, irtäğä isä Tübän Novğorodqa yul totaçaqlar. Anda yaqtaşlarıbız “Torpedo” qomandası belän oçraşa.