Yaqlar 2013 elğı Universiadağa äzerleq qısalarında xezmättäşleq itü mäsäläläre xaqında fiqer alıştı

(Qazan, 26 ğıynvar, «Tatar-inform»). Büğen Tatarstan Respubliqası Prezidentı Röstäm Miñnexanov «PraysvoterxausQupers» («PricewaterhouseCoopers» – «PwC») xalıqara firmalar çeltäre citäqçeleğe belän oçraştı. Oçraşu Davostağı (Şveyçariya) Bötendönya iqtisadi forumı qısalarında uzdı, dip xäbär itä TR Prezidentınıñ matbuğat xezmäte. Oçraşuda yaqlar «PraysvoterxausQupers» qompaniyaseneñ Tatarstan Respubliqasındağı eşçänleğe näticäläre, şul isäptän 2013 elğı Bötendönya cäyğe Universiadasına äzerleq qısalarındağı partnerlıq, respubliqa iqtisadına çit il investiçiyalären cälep itü ölqäsendäğe xezmättäşleq, şulay uq belem birü proeqtların ğamälğä aşıru buença Qazan (İdel bue) federal universitetı belän xezmättäşleq mäsäläläre xaqında fiqer alıştı, dip xäbär itte TR Prezidentınıñ Tışqı elemtälär departamentı direqtorı – TR Prezidentınıñ xalıqara mäsälälär buença yardämçese İsqändär Möflixanov. Oçraşu barışında Röstäm Miñnexanov häm «PraysvoterxausQupers» qompaniyase väqilläre şulay uq belğeçlär äzerläü, iqtisadi strateğiyalär eşläü häm başqa ölqälärdä «PwC» belän Tatarstan arasındağı xezmättäşleqne qiñäytü xaqında da fiqer alışqan. Beleşmä öçen. «PraysvoterxausQupers» («PricewaterhouseCoopers» – «PwC») qompaniyase Tatarstan predpriyatieläre belän 1995 eldan birle eşli. Büğenğe qöndä «PwC» xezmätlärennän «TAİF» AAC, «Tatenerğo», «Qazanorğsintez», «Tatneft», «QAMAZ», «Tatteleqom», «Aq Bars» banqı, «Tübän Qama Neftexim», «Aq Bars» xoldinğ qompaniyase häm başqalar faydalana. «PwC» ofisı Qazanda 2007 elda açıla, 2011 el axırına anda 120 qeşe eşläğän.