Sayt biş öleştän toraçaq: anda “Tarix”, “Qorän suräläre”, “Belem birü”, “Törlesennän”, “Tatarstanda Qorän elı” rubriqaları eşläyaçäq

(Qazan, 26 ğıynvar, “Tatar-inform”, Rimma Ğatina). Büğen TR möselmannarı Diniya näzarätendä 2012 elnı Qorän elı dip iğlan itü uñaennan cıelğan oeştıru qomitetı utırışında möftiyatneñ uqu büleğe mödire Väliulla xäzrät Yaqupov bu elda 31 yunäleştä çaralar uzdırılaçağın xäbär itte. Alar arasında maxsus sayt eşläü dä qaralğan. Ul yaqındağı 2 ay eçendä äzer bulır dip qötelä. Sayt biş öleştän toraçaq: anda “Tarix”, “Qorän suräläre”, “Belem birü”, “Törlesennän”, “Tatarstanda Qorän elı” rubriqaları eşläyaçäq. “Tarix” büleğendä Päyğambär Möxämmädqä (s.ğ.v.) Qorän iñü tarixı, Ğomär xälif vaqıtında Qoränne ber tuplanmağa cıyu tarixı, tuğrı xäliflär idarä itü vaqıtında häm annan soñ bezneñ qönnärğä qadär Qorän taralu tarixları, Qoränneñ törle illärdäğe tanılğan basmaları, tatar xalqı tarixında – Qorän (mäsälän, “Qazan basması”) h.b. belän tanışıp bulaçaq. “Qorän suräläre” büleğendä İzğe qitapnı audio häm basma formatta qürep tıñlap häm uqıp bulaçaq, täfsirlär birelä. Bilğele ber xällär vaqıtında Qorän surälären uqu üzençäleqläre belän tanışu mömqinleğe tudırıla. “Belem birü” büleğendä ğaräp alfavitın, täcvidne (Qorän uqu qağıydäläre) öyränerğä, Qoränğä qağılışlı başqa qağıydälär belän tanışırğa bula. “Törlesennän” büleğendä Qorän moğcizaları, tanılğan qeşelärneñ Qorän turında äytqän süzläre, dönyaqüläm, Rossiya, tatar ädäbiyatında, sänğattä Qoränneñ çağılışı, tanılğan Qorän-xafizlar, Qorän täfsirläre avtorları, Qorän belän dävalau, Qorän turında qitaplar xaqında mäğlümat birelä. “Tatarstanda Qorän elı” rubriqasında çaralar planı häm yañalıqlar qaralğan.