Bıel ölğertelerğä tieşle yortlarnıñ 17 se öçen äle haman da cir qişärleqläre räsmiläşterelmäğän

(Qazan, 27 ğıynvar, “Tatar-inform”, Ayğöl Fäxretdinova). Uzğan el näticäläre buença Tatarstan safqa bastırılğan toraq qüläme buença Mäsqäü ölqäse, Qrasnodar qrae häm Sanqt-Peterburğ şähärennän ğenä qalışıp, il qülämendä 4 nçe urın alğan. Respubliqada 2011 elda 2 mln 396 meñ qv. metr mäydanda toraq tözelğän bulsa, bıelğı plan yöqlämäse tağın da zurraq – 2 mln 480 meñ qv metr mäydannı safqa bastırırğa qiräq. 26 ğıynvarğa respubliqada ellıq birem 6 proçentqa ütälğän – 137,3 meñ qv metr ölğertelğän. Şunıñ 42,4 meñ qv metrı soçial ipoteqa proğrammasına, 45 meñ qv metrğa yaqını qüpqatlı investiçion toraq tözeleşenä, 50 meñ qv. metrı azqatlı tözeleşlärğä qarıy. Bu xaqta büğen TR Xöqümät yortında Premer-ministr İldar Xaliqov räisleğendä videoqonferençiya rejimında uzğan qiñäşmädä tözeleş, arxiteqtura häm toraq-qommunal xucalıq ministrı İreq Fäyzullin citqerde. Ministr qiläse atna dävamında muniçipal berämleqlär başlıqlarına tözeleşe tämamlanğan häm qullanılışqa tapşıru buença doqumentları räsmiläşterelğän yortlarnı statistiqa orğannarı aşa uzdırunı yöqläde. Anıñ çığışınnan añlaşılğança, bıelğı planğa qertelğän yortlar buença şulay da eş biq aqrın bara. 2012 elda safqa bastırılaçaq yortlar tözeleşeneñ cir uçastoqları, şähär tözeleşe, proeqt-smeta doqumentları, injenerlıq infrastruqturası belän täemin iteleşe ministrlıqnıñ aerım qontrolendä. İreq Fäyzullin süzlärenä qarağanda, bıel ölğertelerğä tieşle yortlarnıñ 17 se öçen äle haman da cir qişärleqläre räsmiläşterelmäğän, 2 yort öçen qaralğan cir uçastoğınıñ şähär tözeleşe planı yuq, iqeşär obeqt su, qanalizaçiya çeltäre belän täemin itelmäğän, 16 yort eleqtr belän täemin itü, 7 yort –cılılıq, 6 obeqt ğaz belän täemin itü çeltärlärenä totaşmağan. 14 yort buença äle haman tözeleşqä röxsät alınmağan, tağın 14 yort tözeleşe tieşle doqumentlar belän citärleq täemin itelmäğän. Problemalar aeruça Äğerce, Aqtanış, Baulı, Yuğarı Oslan, Leninoğorsqi, Mendeleevsqi, Balıq Bistäse, Çallı, Qazanda aqtual. Ministr ağımdağı elda toraq tözeleşe öçen qaralğan barlıq cir uçastoqların ğıynvar azağına qadär räsmiläşterep beterü, alarnı tieşle injenerlıq infrastruqturası, şähär tözeleşe doqumentları belän täemin itü zarurlığın assızıqladı. Muniçipalitetlar aldına proeqt-smeta doqumentların da qısqa vaqıt eçendä tämamlau burıçı queldı. “Muniçipal berämleqlärneñ üz territoriyalärendä üz plannarı niğezendä cir uçastoqların räsmiläşterä, tözeleşqä röxsät birüçe tieşle doqumentlarnı äzerli almavına ışanası qilmi. Bu eşlär xäzerğä qaldırılırğa tüğel, uzğan elnıñ sentyabrendä üq başqarılırğa tieş ide inde. Büğenğe etapta tulı qöçenä tözeleş barırğa tieş, ä bezdä qayber tözeleşlär buença cir uçastoqları äle haman räsmiläşterelmäğän. Bu yortlarnı tirä-yunen tözeqländerü, maturaytudan başqa tapşıruğa, eşlärne soñğı qvartalğa qaldıruğa qiteräçäq”, - dip qisätte Premer-ministr İldar Xaliqov. Soçial ipoteqa buença bıel planlaştırılğan 120 yortnıñ ğıynvar aena 29 ı turı qilä. Büğenğä şularnıñ 23 qullanılışqa tapşırılğan. Ay axırına qadär tağın 5 muniçipal berämleqtä 6 yortnı räsmiläşterep beteräse bar. Qüpfatirlı investiçiyale toraq tözeleşenä qilğändä, bıelğa plan 15 meñ 745 fatirğa isäplänğän 104 yortnı safqa bastıru. Xäzerğä 5 muniçipal berämleqtä şundıy 11 yort yuğarı äzerleqtä sanala. Alar 2012 elnıñ berençe qvartalında faydalanuğa tapşırılırğa tieş. İreq Fäyzullin investiçiyale toraq tözeleşenä röxsät birüçe doqumentlarnı räsmiläşterüne dä qatğıy qontrolğä alu qiräq, diğän fiqerdä. Däülät tözeleş qüzätçeleğe inspeqçiyasenä yortlar tözeleşe barışına qontrolne qöçäytü burıçı yöqlänğän.