Çara Davostağı Bötendönya iqtisadi forumı qısalarında uzdı

(Qazan, 27 ğıynvar, «Tatar-inform»). Büğen Tatarstan Respubliqası Prezidentı Röstäm Miñnexanov RF Saqlıq banqı isemennän oeştırılğan eşleqle irtänğe aşta qatnaştı. Çara Davostağı Bötendönya iqtisadi forumı qısalarında uzdı. Bu xaqta TR Prezidentınıñ matbuğat xezmäte xäbär itä. Röstäm Miñnexanovnı TR Prezidentınıñ Tışqı elemtälär departamentı direqtorı – TR Prezidentınıñ xalıqara mäsälälär buença yardämçese İsqändär Möflixanov, “Tatneft” AAC ğeneral direqtorı Şäfäğat Tähautdinov ozatıp yörde. RF Saqlıq banqınıñ İdarä räise häm prezidentı Ğerman Ğref çaranıñ moderatorı sıyfatında çığış yasadı. Aerım alğanda, RF Xöqümäte Räiseneñ berençe urınbasarı İğor Şuvalov, “Luqoyl” AAC prezidentı Vağit Aleqperov, “Sqolqovo” fondı prezidentı Viqtor Veqselberğ, Rossiyaneñ eleqqeğe finans ministrı, professor Aleqsey Qudrin häm başqalar eşleqle irtänğe aşta qatnaşuların rasladı. Çara “Yaña Rossiya, yaña Auropa: zur üzğäreşlär” diğän temağa bağışlanğan ide. Anda qatnaşuçılar Auropa häm Rossiyadä iqtisadi häm soçial moxitneñ niçeq üzğäräçäğe, Auropa zonasında närsä bulaçağı häm Auropa zonasındağı vaqıyğalarnıñ Rossiyadä ni räveşle çağılış tabaçağı, säyasi institutlarnıñ niçeq üzğäräçäğe häm monıñ qeşelär tormışında ni räveşle çağılış tabaçağı xaqında fiqer alıştı.