Niqolay Niqiforov: “Elemtä tarmağı – qöndäşle tarmaq, ber qönğä artta qalunı da ozaq ellar tözäterğä turı qilüe ixtimal”

(Qazan, 27 ğıynvar, “Tatar-inform”, Ğölnar Ğarifullina). Büğen Qazan elemtä eleqtrotexniqumı bazasında uniqal texnoloğiq üzäq açıldı. Tatarstannıñ zamança oeşmaları safına asılı iñ yaña texnoloğiyalärdän ğıybarät bulğan tağın ber üzäq östälde. Açılış çarasında TR Premer-ministrı urınbasarı – Mäğlümatlaştıru häm elemtä ministrı Niqolay Niqiforov, “Cisco” oeşması ğeneral direqtorı Pavel Betsis, “Tatteleqom” AAC ğeneral direqtorı Lotfulla Şäfiğullin häm başqa räsmi zatlar qatnaştı. Qunaqlar başta TR elemtä tarixı muzee belän tanıştı. Uniqal muzey Pavel Betsis qüñelenä xuş qilde. “Bu çarada qatnaşuıma, Tatarstan belän xezmättäşleqqä biq şatmın. Tatarstan il töbäqläre arasında iñ aldınğı texnoloğiq subeqt”, - dip belderde “Cisco” citäqçese. “Tatteleqom” AAC häm Cisco qompaniyase xezmättäşleğe cimeşe bulğan bu proeqt şähär häm respubliqa masştabındağı çeltärlärğä xezmät qürsätü buença xalıqara däräcädäğe yuğarı qvalifiqaçiyale IT-belğeçlärne äzerlärğä yardäm itäçäq. Studentlar uqu proçessı barışında uq, xalıqqa elemtä operatorları tarafınnan aqtiv qürsätelüçe yaña texnoloğiya serlärenä töşenä alaçaq. “Rossiya qülämendä bu üzäqqä tiñnär yuq häm Tatarstan bu yunäleştä ildä aldınğı buluı belän ğorurlana ala”, - Pavel Betsis jurnalistlarğa şulay dip belderde. “Texnoloğiq üzäq diğändä, qüz aldına zur qatlaulı caylanmalar qilep basa, ä biredä bez az sanlı qompaqtlı cihazlar, sistemalar qüräbez. Eleq zur ğabaritlı caylanmalar qullanıluın istä totıp, elemtä tarmağınıñ niçeq üseş aluın menä şunnan qürä alabız. Proğress alğa bara, elemtä häm mäğlümatlaştıru qamilläşä”, - dip çığış yasadı Niqolay Niqiforov. Ul bilğeläp uzğança, biredä uquları tämamlanıp qilğändä yuğarı xezmät xaqı alırğa laeqlı bulğan belğeçlär çığaçağı quandıra. “Elemtä bazarı zıyalı, zamança texnoloğiyalärne tirän belğän belğeçlär belän baetılaçaq. Şul räveşle Tatarstan iñ zamança qommuniqaçiya texnoloğiyaläre buença aldınğı poziçiyasen saqlap qalaçaq. Elemtä tarmağı iqtisadnıñ şaqtıy citdi tarmağı sanala, operator- qompaniyalär yuğarı tüläüle xezmät urınnarı buldıra, salım tüli. Qvalifiqaçiyale belğeçlärğä ixtıyac zur buluın beläbez. Alarnıñ xezmät xaqı härvaqıt üseş qiçerä. Uzğan elda xezmät xaqı üseşe 30 proçent däräcäsendä buldı. Bu tarmaqnıñ qızu templar belän alğa qiteşen dälilli. Bu totrıqlılıqnı saqlau öçen iñ zamança texnoloğiyalär belän suğarılğan üzäqlär buldıru häm yaş buın belemen täcribädä sınau zur ähämiyatqä iya. “Tatteleqom” nıñ bu proeqtnı ğamälğä aşıruğa citdi öleş qertüe söenderä. Elemtä tarmağı – qöndäşle tarmaq, ber qönğä artta qalunı da ozaq ellar tözäterğä turı qilüe ixtimal. Mondıy proeqtlar sanın arttırırğa qiräq, biredä äzerlänüçe yaşlärneñ sanın da üsterü zarur”, – dip töğälläde viçe-premer.