Büğen “Tatar-inform” ağentlığı studiyasendä F.İ.Şalyapin isemendäğe XXX Xalıqara festival açılışına äzerleq mäsälälärenä bağışlanğan matbuğat oçraşuı uzdı

(Qazan, 27 ğıynvar, “Tatar-inform”, Rimma Ğatina). Büğen “Tatar-inform” ağentlığı studiyasendä F.İ.Şalyapin isemendäğe XXX Xalıqara festival açılışına äzerleq mäsälälärenä bağışlanğan matbuğat oçraşuı uzdı. Bilğele bulğança, opera forumı Qazanda 1-17 fevral qönnärendä ütäçäq. Festival “Evğeniy Oneğin” speqtaqle premerası belän açıla. Premerağa äzerleq xaqında söyläü öçen, büğen ağentlıq studiyasenä SSSRnıñ xalıq artistı, Mariya teatrı solistı, Nyanya rolen başqaruçı Larisa Şevçenqo, Mariya teatrı solistı, Oneğin rolen başqaruçı Vladimir Moroz, Stanislavsqiy häm Nemiroviç-Dançenqo isemendäğe Mäsqäü teatrı solistqası Tatyana rolen başqaruçı Amaliya Ğoğeşvili häm teatrnıñ matbuğat xezmäte citäqçese Janna Melniqova qilde. Janna Melniqova xäbär itqänçä, bıel “Evğeniy Oneğin” operasın quyuçı qomanda qöçlelärdän sanala. “Operada muzıqa möhim. Şuña qürä şunnan başlıym. Premeranıñ muzıqa citäqçese – qüreneqle dirijer häm pianist Mixail Vasileviç Pletnev. Bezneñ teatr belän eşlärğä riza bulğanı belän bez biq ğorurlanabız. Maestro, Qazanğa qilep, repetiçiyalärğä qereşte. Operanıñ dirijerı - bezneñ teatr dirijerı Rinat Salavatov. Postanovqanı Mixail Bonjavidze quya. Ul Qazan tamaşaçısına yaxşı tanış”, - dip söyläp ütte matbuğat xezmäte citäqçese. “Evğeniy Oneğin” operasındağı partiyalärne başqaru öçen, büğen studiyağä qilğän qunaqlardan tış, ilneñ äydäp baruçı teatrları artistları çaqırılğan: Oneğin – Andrey Ğriğorev; Olğa - Elena Maqsimova, Eqaterina Serğeeva; Lensqiy – Serğey Sqoroxodov, Dmitriy Quzmin; Ğremin – Mixail Qazaqov; Larina – İrina Ğelaxova; Triqe – Qonstantin Plujniqov. Larisa Şevçenqo süzlärençä, Qazan ilneñ muzıqal tormışında aerım urın alıp tora. “Şalyapin isemendäğe festival turında ğel yaxşı fiqerlär ğenä işeterğä turı qilde. Şuña qürä bu festivaldä qatnaşuıma şatmın. Qüreneqle rejisser Mixail Bonjavidze belän eşläü minem öçen bäxet. Mixail Pletnev belän dä şulay uq. Min “Evğeniy Oneğin”nıñ biq qüp postanovqalarında qatnaştım. Monda berençe tapqır personajlarğa qarata başqa törle mönäsäbät qürdem. M.Bonjavidze obrazlarnı aça belä. Obrazlar balaçaqtan uq qüñelğä qerep qalğança tüğel, ä biq “tere”, ğadäti qeşelär bulıp qilep çığa. Min bu speqtaql biq qızıqlı qilep çığar, dip uylıym. Çönqi ul talantlı qeşe tarafınnan quela”, - dide Nyanya rolen başqaruçı artistqa. Oneğin rolen başqaruçı Vladimir Moroz da festivalğä çaqırunı şatlanıp qabul itqän. “Evğeniy Oneğin” – anıñ yaratqan äsäre, ul Oneğin partiyasen citmeştän artıq speqtaqldä başqarğan, 6 törle postanovqada çığış yasağan. Ul üze öçen bu speqtaqlne “yañadan açarğa” ömetlänä. “Min Qazanğa qilüne tüzemsezlänep qötem. Bu festivalneñ abrue şaqtıy yuğarı. Annan soñ bit äle Qazan – Fedor Şalyapinnıñ tuğan cire. Balaçaqta operadan alğan berençe täesirlärem Fedor Şalyapin çığışlar yazdırılğan tälinqälär belän bäyle. Ul miña biq nıq yoğıntı yasadı”, - dip belderde V.Moroz. Tatyana rolen başqaruçı Amaliya Ğoğeşvili fiqerençä, rejisser belän artistlar üzara añlaşıp, biq qileşep eşli. “Min Mixail Vasileviç Pletnev belän xezmättäşleq itüemä dä biq şat. Ul neçqäleqlärğä nıq iğtibar itä, ä muzıqada şuşı neçqäleqlärdän qüp närsä tora. Ä Mixail Bonjavidzeğa qilğändä, ul şulqadär enerğiya birä, böten obrazlarnı qürsätep birä. Bolarnı xor belän dä tulılandıra. Ul bu eş öçen “yanıp tora”, - dip belderde artistqa, solistlarğa başqaru ostalığı aşa obrazlarnı “tere qeşelär” itep qürsätü burıçı queluın. Artistlar festivalne oeştıru yağınnan da üzläreneñ uñay fiqerlären citqerde. F.İ.Şalyapin isemendäğe XXX Xalıqara festival qısalarında premera 1-3 fevral qönnärendä baraçaq.