Räsmi xäbärlär, Awil xucaliği

Röstäm Miñnexanov Teläçe rayonında yazğı qır eşläre barışı belän tanıştı

Rayonda çäçü eşläre ekvatorğa citkän: bügengä 12,1 meñ ğa mäydan eşkärtelgän

 (Qazan, 8 may, «Tatar-inform»). Tatarstan Prezidentı Röstäm Miñnexanov bügen Teläçe munitsipal' rayonında yazğı qır eşläre barışı belän tanıştı. TR Prezidentın eş säfärendä TR vitse-premyerı - TR awıl xucalığı häm azıq-tölek ministrı Marat Äxmätov ozatıp yörde.

Bu xaqta TR Prezidentı matbuğat xezmäte täğäyenlägänçä, Ğiniätullinnıñ çista toqımlı atlar ürçetü buyınça ere ferması krestian-fermerlıq xucalığı mäydanında xucalıq citäkçeläre belän oçraşu uzdı. TR Prezidentı aşlamalar häm törle awıl xucalığı kul'turaları orlığı kürgäzmäsen qaradı. Ağrariylar süzlärençä, ber genä xucalıqta da citeştsezleklär yuq.

Rayonda çäçü eşläre ekvatorğa citkän: bügengä 12,1 meñ ğa mäydan (52 protsent) eşkärtelgän. Bigräk tä ququruz häm rapsqa zur iğtibar birelä.

"Qırlarnı qaradıq, bar cirdä dä eş qaynıy. Hawa torışı bozılmasa, çäçü eşläre waqıtında tämamlanaçaq", - dip bilgeläp ütte Röstäm Miñnexanov.

Rayon başlığı İldus Zaripov respublika programmaların ğämälgä aşıru häm şulay uq "Teläçe" sänäğät parkı territoriäsendä yaña proyektlar turında söyläde.

Annarı Röstäm Miñnexanov Teläçe awılı üzäk parkına yünälde, Böyek Watan suğışı frontlarında häläk bulğan xärbilär stelasına çäçäklär quydı. Biredä veterannar belän oçraşu da buldı.

İskärtep ütik: suğış yıllarında rayonnan 4,5 meñgä yaqın keşe suğışqa kitkän, barı tik öçtän bere genä kire äylänep qaytqan. Xäzer rayonda 410 veteran yäşi: 11 yı suğışta qatnaşqan häm 339 tıl xezmätçännäre, Böyek Watan suğışında qatnaşuçılarnıñ tol qalğan xatınnarı.

Tatarstan Prezidentı veterannarnı Böyek Ciñü köne belän qotladı, alarğa sälämätlek häm ozın ğömer teläde.

Soñınnan Röstäm Miñnexanov Teläçedä arendağa toraq programması buyınça tözelä torğan küp fatirlı yortnı qaradı. Bügengä obyektta barlıq eşlär dä başqarılğan, yort territoriäsen tözekländerü tögällänep kilä. Obyektnı tapşıru sroğı - 2016 yılnıñ II kvartalı. Fatirlar "Teläçe" sänäğät parkı rezidentları belgeçlärenä bilgelängän.


Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши