Din

Kamil xäzrät Sämiğullin: "Din öçen borçılğan här möselman häm jurnalist DAİŞqa qarşı köräşkä üz öleşen kertergä tieş"

"Qazanda "Onlayn MMÇ: mäğlümat qırında DAİŞqa qarşı toru" xalıqara fänni-ğämäli konferentsiäse uzdırıldı

 (Qazan, 19 may, "Tatar-inform", Liliä Lokmanova). Bügen Tatarstan Fännär akademiäsendä "Onlayn MMÇ: mäğlümat qırında DAİŞqa qarşı toru" xalıqara fänni-ğämäli konferentsiäseneñ plenar utırışı buldı. Rossiä töbäklärennän, yaqın häm yıraq çit illärdän din ähelläre, jurnalistlar çaqırılğan älege çara, Tatarstan Prezidentı Röstäm Miñnexanov citäkçelegendäge “Rossiä – islam dönyası” strategik küzallawlar törkeme çaraların tormışqa aşıru maqsatınnan, şulay uq Rossiä häm İslam xezmättäşlege illäreneñ "Rossiä - İslam dönyası: KazanSummit" VIII xalıqara iqtisadi sammitı qısalarında ütkärelgän çaranıñ berençe öleşe töşkä qädär "Qorston" kompleksında uzdı. Plenar utırış, ğädät buyınça, Qor'än uqu belän başlanıp kitte. Çara TR möftie urınbasarı Röstäm Batrov räislegendä ütte.

Tatarstan möftie Kamil xäzrät Sämiğullin qatnaşuçılarnı sälämläp: "Bügenge zamanda massaküläm mäğlümat çaraları, waqiğalarnı yaqtırtuda töp rol'ne başqarudan tış, belem taratuda häm ictimaği fiker formalaştıruda ähämiätle instrument bulıp tora. Şunı da äytergä kiräk: MMÇ suğış qoralına äylänep bara. Mäğlümat çaralarınıñ role häm möhimlege yıldan-yıl üsä. Bügen televidenie, radio, ğäzeta, internet dönyanıñ äydäp barğan illäre qulında "yomşaq" instrument bulıp tora. Şuña kürä däwlät häm ictimaği instrumentlar xalıqqa taratılğan mäğlümatnıñ ideologik eçtälegenä ayıruça iğtibarlıraq bulırğa tieş. Yış qına alarda faşizm, ateizm, şovinizm çalımnarı kürenä. Qızğanıç, bu problemalar islam dönyasın da çitlätep uzmıy", - dide ul häm MMÇnıñ kübese yözlärenä plürallizm bitlege kiep, cämğiätkä DAİŞ ideologiäsen taratuın bilgeläp ütte.

Kamil xäzrät fikerençä, DAİŞnıñ islamğa bernindi qatnaşı yuq. Süzen raslaw öçen ul xädislärdän misallar kiterde. "DAİŞ suğışçıları - islam artına yäşerengän, xärbiläşkän banditlar. Bu xaqta DAİŞ eşçänlegen tänqitlüçe möselman ğalimnäreneñ äytülärennän beläbez. DAİŞ öçen dönyaküläm säyäsät berläşkän. Ul idärä itep bula torğan xaos instrumentı ğına", - dide respublikanıñ islam dine liderı häm ägär bu süzlär döres bulmasa, sotsial' çeltärlärdä älege oyışmağa çaqırğan, aña quşılırğa öndägän yözlägän aqquantlar barlıqqa kilmäs ide digän fiker äytte.

DAİŞ üzeneñ ideologiäsen törle tellärgä, şul isäptän rusçağa, tärcemä itep taratuın, şuña da bu oyışmanıñ 30 protsentın möselmannar häm möselman illärennän çığuçılar täşkil itüen assızıqladı respublika möftie. "Bilgele bulğança, MMÇğa ğädäti xärbi çaralar belän qarşı toru mömkin tügel. Mäğlümat bernindi qarşılıqlarğa oçramıyça, çiklärne uza. Bügenge köndä böten dönya mäğlümati suğışta qatnaşa. Distruktiv ideologiädän iñ yaxşı saqlawçı ul - alternativ matbuğat", - dip sanıy Kamil xäzrät. Tatarstan möselmannarı Diniä näzaräteneñ bu ölkädäge täcribäsen urtaqlaştı. Näzarätneñ sotsial' çeltärlärgä dä iğtibar birüen bilgeläp ütte. Mondıy eşlärne başqa näzarätlär dä alıp barsın ide, digän teläk äytte. "İslam - tınıçlıqqa, ğädellekkä çaqıra torğan pak din. Möğäyen, möselmannarnıñ elekkege imidjın qaytaru öçen distä yıllar tırışırğa kiräk bulır. Çönki islamğa bernindi qatnaşı bulmağan DAİŞ terrorçıları dingä salğan zıyan bik zur. Elek möselman bulğannar, xäzer käferlärgä äylängän. Din öçen borçılğan här möselman häm jurnalist DAİŞqa qarşı köräşkä üz öleşen kertergä tieş", - digän öndäw belän tämamladı çığışın Kamil xäzrät Sämiğullin.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши