Cämğiät, Din

İslam dönyası ğalimnäre, DAİŞ barlıq çiklärne dä uzdı, dip sanıy

Qazanda "Onlayn MMÇ: mäğlümat qırında DAİŞqa qarşı toru" xalıqara fänni-ğämäli konferentsiäneñ plenar utırışı bara

 
(Qazan, 19 may, "Tatar-inform", Liliä Lokmanova). Bu minutlarda Tatarstan Fännär akademiäsendä "Onlayn MMÇ: mäğlümat qırında DAİŞqa qarşı toru" xalıqara fänni-ğämäli konferentsiäneñ plenar utırışı bara.

Anda TR möselmannarı Diniä näzaräte räise, möfti Kamil xäzrät Sämiğullinnıñ, Misır Prezidentınıñ dini eşlär buyınça kiñäşçese Usama Säyd Äl-Äzhäri, Dämäşq universitetı doktorı, Levant ğalimnäre citäkçese Möxämmätd Täwfıyq Ramazan Äl-Butı, İordaniä universitetı professorı şäyex Ğabderrazaq Äs-Säğdi, RF EEMnıñ ekspert sovetı äğzası Leonid Sükiäyn, TR Fännär akademiäse islam tikşerüläre üzäge direktorı Rinat Pateyev çığış yasadı.

Utırış TR MDN räiseneñ berençe urınbasarı Röstäm xäzrät Batrov räislendä uza. Usama Säyd Äl-Äzhäri fikerençä, DAİŞ bernindi dä "İslam däwläte" tügel. "DAİŞ - başqa millätlärne häm dinnärne qurqınıç astına quya torğan firqä ul. Alar islamnı üz maqsatlarında faydalana. Döreslektä, DAİŞ - terrorçılıq ağımı häm qurqınıç tudıruçı firqä. Ul inde böten çiklärne dä uzdı", - di delegat. Anıñ fikerençä, mondıy oyışmalar islam dinen döres añlatmaw näticäsendä barlıqqa kilä. DAİŞnı ul elekkege xarizilär belän çağıştırdı häm alar arasında ayırma yuqlığın assızıqladı. Aña qarşı köräşü öçen döres mäğlümat taratırğa, döres belem birergä kiräk, digän fikerdä Usama Säyd Äl-Äzhäri. Misır Prezidentı kiñäşçese fikerençä, bu yünäleştä Tatarstan xäkimiäte häm respublika möftiäte tarafınnan zur eşlär başqarıla. Bolğar İslam akademiäse dä moña zur öleş kertäçägenä ömetlänüen belderde ul.

Ğabderrazaq Äs-Säğdi fikerençä, DAİŞ wäkilläre keşelärne üz maqsatlarında faydalanıp, alarnıñ qanın qoya. "DAİŞ qan qoyu, bozıqlıq taratu belän bäyle, ul inde barlıq çiklärne dä uzdı. DAİŞ Cir şarında yaman şeş kebek barlıqqa kilde. Elek tä mondıy firqälar bar ide, tik alar, waqıt uzu belän, yuqqa çıqtı. Bu oyışmalarda adaşqan fikerle keşelär tuplanğan. Alarnı barı döres fiker belän genä ciñep bula", - dide ul. DAİŞ wäkilläre bik waq mäs'ällärgä dä bäylänä, misal öçen, sälämläwgä. Alar cirlekneñ ğöref-ğädätlären xörmät itmi, dip sanıy İordaniä professorı. Süz uñayınnan, bu ğalim Bolğar islam akademiäsenä belem birergä çaqırılğan.

"DAİŞ öçen islam - üz maqsatların tormışqa aşıru ısulı. Alar islamnı üz mäs'älälären çişü öçen faydalana. İslam qan qoyu häm köçläwgä nigezlänä alamı? Bu mömkin eş tügel. İslam dönyada bara torğan protsesslarda aktiv qatnaşuçı bula ala. Ämma ul ayırılırğa tügel, ä berläşergä tieş", - dip sanıy RF EEMnıñ ekspert sovetı äğzası Leonid Sükiäyn. Teläsä qaysı terrorçılıq oyışmaların, islam normaların üz mänfäğätlärendä faydalanırğa teläwçelärgä qarşı berläşep köräşergä kiräk, di ul.

Fotosurät http://islam-today.ru saytınnan alındı.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши