Din

"İzge Bolğar cıyını" başlanıp, Bolğar akademiäse nigezenä istälek qapsulası salındı

Tantanada Tatarstan citäkçelege häm törle illär din ähelläre qatnaştı

(Bolğar, 21 may, "Tatar-inform", Liliä Lokmanova). Bu minutlarda Bolğar şähärendä İzge Bolğar cıyını bara. Anı açu tantanasın uzdıru öçen Bolğar islam akademiäse tözelä torğan urınnan yaqın arada säxnä urnaştırılğan. Ul zäñgärsu, yäşkelt, sarı häm aq töslärdäge tatar milli bizäkläre belän bizälgän ide. Tamaşaçılar öçen maxsus eskämiälär urnaştırılğan. "İzge Bolğar cıyını" na kilüçelär öçen Bolğar tarixın çağıldırğan film töşerelgän. Ul säxnäneñ ike yağınnan ekrannar aşa kürsätelde. 

Çara Qor'än äyätläre uqu belän başlanıp kitte. Berniçä minuttan soñ säxnägä bäyrämneñ räsmi qunaqları kütärelde. Alar arasında TR Prezidentı Röstäm Miñnexanov, TR Däwlät Kiñäşçese, TR tarixi häm mädäni häykällärne torğızu buyınça "Yañarış" Respublika fondı popeçitellek sovetı räise Mintimer Şäymiev, TR Däwlät Sovetı Räise Färit Möxämmätşin, TR Premyer-ministrı İldar Xalikov, Millätlär eşläre buyınça federal' agentlıq citäkçese İgor' Barinov, Rossiä Yuğarı möftie, Rossiä möselmannarı Üzäk Diniä näzaräte räise şäyxelislam Tälğät Tacetdin, Rossiä möftiläre şurası häm Rossiä möselmannarı Diniä näzaräte räise Rawil Ğaynetdin, TR möselmannarı Diniä näzaräte räise, möfti Kamil xäzrät Sämiğullin, Tönyaq Qawqaz möselmannarınıñ koordinatsion üzäge räise, möfti İsmäğil xaci Berdiev, Qazan häm Tatarstan mitropolitı Feofan h.b. räsmi zatlar bar ide. 

Röstäm Miñnexanov Bolğar cirlegendä beryulı ike bäyräm buluın bilgeläp ütte. Anıñ berençese İslam dinen räsmi qabul itkän kön bulsa, ikençese isä Bolğar islam akademiäse nigezenä istälek qapsulası salu. "Bezneñ burıç - dinebezne, ğöref-ğädätlärebezne, yolalarıbıznı saqlap qalu. Soñğı yıllarda monda küp närsä eşlänelde", - dide respublika citäkçese häm älege izge urınnı torğızuda yärdäm itüçelärgä räxmät belderde. Olı räxmätlären ul TR Däwlät Kiñäşçese Mintimer Şäymiev adresına yulladı, tantana aldınnan Bolğarda tözelä torğan qunaqxanäne qarawların xäbär itte. "Bu möselmannar ğına tügel, bezneñ böten qunaqlarıbız da kilä torğan urın bulaçaq. İñ möhime - bezneñ, ilebezneñ dinlelegen saqlap qalu. Monıñ öçen bez layıqlı belem birü yortı buldırırğa tieş. Qızğanıç, yöz yıl eçendä bez bik küp närsä yuğalttıq. Bezneñ tarixıbızda böten dönyağa tanılğan tatar möselman ğalimnäre küp bulğan. Qızğanıç, ul waqıtlar inde uzğan", - dide häm bügen nigez salınaçaq akademiäneñ eş maqsatı layıqlı din ähelläre äzerläw ikänen assızıqladı. 

"Bügen dönyada ciñel waqıtlar tügel, bigräk tä islam dinendä. Şuña da bez tınıçlıq häm tatulıqta niçek yäşäw ürnägen kürsätergä tieş. Ata-babalarıbızdan küçkän ğöref-ğädätlär şul tınıçlıq nigeze bulıp tora", - dide Röstäm Miñnexanov häm cıyında qatnaşuçılarğa räxmät äytep, isänlek-sawlıq teläde. 

İgor' Barinov bu urınnı ğäcäyep tarixi urın dip atadı. "Mondıy proyektlar Tatarstan öçen genä tügel, il öçen dä möhim. Alarnıñ möhimlege - ilküläm mäs'älälärne xäl itüdä, konfessiäara häm millätara tınıçlıqnı urnaştıruda, dini qarşılıqlar kiterep çığarmawda, bezneñ xalıqnıñ berdämlegen nığıtuda häm ilneñ xalıqara däräcäsen kürsätüdä", - dip assızıqladı häm dini belem birü proyektlarınıñ näq menä xäzer kiräklegen bilgeläp ütte. 

Alğa taba tantanada qatnaşuçılarğa Mintimer Şäymiev möräcäğät itte. "Yıldan-yıl bezneñ oçraşuıbıznıñ eçtälege bayıy, üzara añlaşu haman kiñäyä. Tağın da uñaylı şartlar tudırabız, bu yünäleştä eşlär bara. Äle şuşı könnärdä genä İdelgä çığa torğan yulda tiränäytü eşläre başqardıq. Xäzer zur teploxodlar, qaysı yaqtan ğına kilsälär dä, Bolğarnıñ izge cirlären kürä alaçaq", - dip xäbär itte. 

Akademiägä kilgändä, Däwlät Kiñäşçese anıñ böten şartlar tudırılğan kompleks bulaçağın bilgeläp ütte. Kamil xäzrät Sämiğullin tantanağa kilüçelärgä Allah süzlären citkerep, ğilem estäwneñ här möselman öçen farız ğämäl buluın assızıqladı. "Bu akademiäbez ğilem üzäge bulaçaq, ğilemebezne böten dönyağa tarataçaq. Bolğar islam akademiäsen buldıru yulında barça tırışlıqlarıbız uñ häm bäräkätle bulsın", - digän teläklären ireşterde möfti. 

Tälğät Tacetdin çığışında: "Bügen bez Allahnıñ "Uqı" digän ayäten tormışqa aşırabız. Ata-babalarıbız borınğıdan mäçet yanında mädräsä salğan. Bügen dä bu ğädätebez bar, Allağa şöker", - dip şökerana qıldı. 

"İzge Bolğar cıyını" qısalarında, Bolğar islam akademiäse nigezenä istälek qapsulası salındı, añarçı anıñ eçtälege uqıldı. İstälek qapsulası salınğanda, bar xalıq täqbir äytep tordı. Kiläçäk buınğa yullanılğan qapsula tatar, rus, ingliz häm ğäräp tellärendä yazılğan. RF Prezidentı Vladimir Putin tarafınnan xuplanılğan dini belem birü yuğarı uqu yortında ber ük waqıtta 300 läp keşe uqıy alaçaq. Bolar - kvalifikatsiälären kütärä torğan imamnar, 75-100 çaması magistrlar häm doktorlar. Akademiädä 5 kafedra eşlär dip niätlänä. 

Cıyın Bolğar şähärlegendä 1995 yıldan birle oyıştırıla. Bu cıyınnı Rossiä möselmannarınıñ Üzäk Diniä näzaräte räise Tälğät Tacetdin ğämälgä quyğan. 2005 yıldan ul TR Mädäniät ministrlığı, Bötendönya tatar kongressı Başqarma komitetı, TR möselmannarı Diniä näzaräte häm Spas munitsipal' rayonı tırışlığı belän ütkärelä. TR Däwlät Sovetı, bu çaranıñ möhimlegen istä totıp, “Tatarstan Respublikasınıñ bäyräm häm istälekle dataları turında”ğı TR Zakonına üzgäreşlär kertü xaqında” TR Zakonın qabul itte. Şulay itep, 21 may İdel Bolğarstanı tarafınnan İslam dinen räsmi räweştä qabul itü köne häm istälekle data itep täğäyenlände. "İzge Bolğar cıyını" öylä namazı belän tämamlanaçaq.

 

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши