Din

"İzge Bolğar cıyını"nda öylä namazı uqıldı

Cıyında Bolğar islam akademiäse nigezenä istälek qapsulası salındı

(Qazan, 21 may, "Tatar-inform", Liliä Lokmanova). Bügen Bolğar şähärlegendä, 922 yılda İdel buyı Bolğar däwläteneñ islam dinen räsmi qabul itü köne uñayınnan, "İzge Bolğar cıyını" buldı. Ul öylä namazı belän tämamlandı, anı Cämiğ mäçete qarşında uqıdılar. Ğibadät qıluda TR Prezidentı Röstäm Miñnexanov, TR Däwlät Kiñäşçese Mintimer Şäymiev, TR Premyer-ministı urınbasarı Wasıyl Şäyxraziev, Rossiä möselmannarı Üzäk Diniä näzaräte räise şäyxelislam Tälğät Tacetdin, TR möselmannarı Diniä näzaräte räise, möfti Kamil xäzrät Sämiğullin h.b. räsmi zatlar qatnaştı. 

"İzge Bolğar cıyını" qısalarında, Bolğar islam akademiäse nigezenä istälek qapsulası salındı, aña qädär anıñ eçtälege cämäğät aldında uqıldı. İstälek qapsulası salınğanda bar xalıq täqbir äytep tordı. Kiläçäk buınğa yullanılğan qapsula tatar, rus, ingliz häm ğäräp tellärendä yazılğan. RF Prezidentı Vladimir Putin tarafınnan xuplanılğan dini belem birä torğan yuğarı uqu yortında ber ük waqıtta 300 läp keşe uqıy alaçaq. Bolar - kvalifikatsiälären kütärä torğan imamnar, 75-100 çaması magistrlar häm doktorlar. Akademiädä 5 kafedra eşlär dip niätlänä. 

Cıyın Bolğar şähärlegendä 1995 yıldan birle oyıştırıla. Bu cıyınğa Rossiä möselmannarınıñ Üzäk Diniä näzaräte räise Tälğät Tacetdin nigez salğan. 2005 yıldan ul TR Mädäniät ministrlığı, Bötendönya tatar kongressı Başqarma komitetı, TR möselmannarı Diniä näzaräte häm Spas munitsipal' rayonı tırışlığı belän ütkärelä. TR Däwlät Sovetı, bu çaranıñ möhimlegen istä totıp, “Tatarstan Respublikasınıñ bäyräm häm istälekle dataları turında”ğı TR Zakonına üzgäreşlär kertü xaqında” TR Zakonın qabul itte. Şulay itep, 21 may İdel Bolğarstanı tarafınnan İslam dinen räsmi räweştä qabul itü köne häm istälekle data itep täğäyenlände.

 

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши