Millättäş

Xäzer keşelär arasında ğömer cebe iñ ozın bulğan Tänzilä äbi XIX ğasırda uq tuğan

Rossiä Ginness rekordlar kitabına kergän äbekäy Ästerxan bistäläreneñ bersendä ğömer yomğağın sütä

 (Qazan, 23 may, “Tatar-inform”). Ästerxan ölkäseneñ İslamğazı bistäsendä yäşäwçe 120 yäşlek Tänzilä Bisämbäyeva – dönyanıñ iñ ölkän keşese. Ğömer ozınlığı buyınça ul Rossiä Ginness rekordlar kitabına kergän.
İnternet çığanaqları mäğlümatları buyınça, Tänzilä äbi - tatar milläte wäkile. Anıñ öç ulı, un onığı, 24 onıqçığı, onıqçıqlarınıñ 2 balası bar.

Tänzilä Bisämbäyeva 1896 yılnıñ 14 martında Ästerxan ölkäse Krasnoyarsk rayonı İslamğazı awılında sigez balalı işle ğailädä tuğan. Ğömere buyı kolxozda tir tügä. İre suğıştan qaytmıy. Urtaq ulları da ozaq yäşämi, baqıylıqqa küçä. Böten ilgä kilgän afät – Böyek Watan suğışı waqıtında Tänzilä äbi, çordaşları kebek, qışqı salqınnarda yalan qul oqop qazıy, döyägä salıp, telegraf bağanaların da taşıy.

Suğış betkändä, xatınğa inde 49 yäş bula. Peşkän alma kebek tupıldap torğan yäp-yäş qızlarğa da ir bulmağan çorda, Tänzilä ğailä, balalar turında xıyallanmıy da. Ä tormış üzeneken itä: inde pensiä kenägäse açar waqıt citkändä, 60 yäşlek ber qazaq kiäwgä çığarğa täqdim yasıy. Tänzilä 53 yäşendä berençe urtaq balaların taba, ber yıldan tağın bersen, 57 yäşendä yänä bäbi alıp qayta. Ulları xäzer üzläre dä pensiädä, yortları äniläre öyennän yıraq tügel genä urnaşqan. Ä Tänzilä äbi, üze tatar häm qazaq qanunnarı buyınça, töpçek ulında yäşi.

Äbi öç ulın da belemgä om¬tıluçan, qızıqsınuçan bulıp üsterergä tırışqan. Üze rusça ber kälimä süz belmäsä dä, balaların, niçek bulsa da, bu telne öyränegez, dip ügetlägän.

Şunısı qızıq: äbi 100 yäşenä qädär üz ğömerendä ber tapqır da tabibqa möräcäğät itmägän, balaların da öydä genä tapqan. Barı 100 yäşlek yübileyen bilgeläp ütkäç kenä, naçar kürä başladım dip, küzenä operatsiä yasatqan.

Äbi inde uramğa çıqmasa da, öy tiräsendä irkenläp yöri, üzen üze qarıy ala. Tatar cırların başqarırğa da yarata ikän. Onıqları anı tılsımçı dip uylıy, ä ulları haman da äniseneñ mäxäbbäte, qoçaqlap söyüe teläsä nindi awırudan qotqara ikänenä ışana. Äniläreneñ ozaq yäşäw serlären ulları anıñ yaxşı küñelle, tormışqa pozitiv qaraşta buluında kürä.

Äbi barı tik natural' rizıqlar ğına aşıy dilär.

Ästerxan ölkäsendä 71 keşe yöz yäş çigenä citsä, Tatarstanda andıylar sanı – 189.

Tänzilä äbi – dönyada ikençe iñ ozaq yäşäwçe keşe, dip yaza “Şähri Qazan” ğäzetası.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши