Din

Kamil xäzrät Sämiğullin: “Çit il keşese Bolğar islam akademiäse rektorı bula almıy”

Rektornı saylaw qararı kümäkläşep qabul iteläçäk

 (Qazan, 23 may, “Tatar-inform”, Liliä Lokmanova). Bolğar islam akademiäse rektorı kem bulaçağı älegä bilgele tügel, ämma anı saylaw protsessı bara. Şunısı mäğlüm — akademiä rektorı wazıyfasın çit il keşese başqarmayaçaq.

Bu xaqta bügen “Tatar-inform” mäğlümat agentlığı uzdırğan matbuğat konferentsiäsendä TR möselmannarı Diniä näzaräte räise, möfti Kamil xäzrät Sämiğullin xäbär itte.

“Yaqın kiläçäktä popeçitellär sovetı bilgelänäçäk. Ul isä, üz çiratında, belem birü programması, akademiägä qabul itü şartları, nindi belgeçlär cälep iteläçäge, akademiädä nindi fakul'tetlar häm yünäleşlärdä eş alıp barılaçağın xäl itäçäk”, - dip belderde Kamil xäzrät Sämiğullin. Süz uñayınnan, akademiädä tatar telen öyränügä dä iğtibar bireläçäk.

Yuğarı dini belem birä torğan uqu yortınıñ rektorına kilgändä, Kamil xäzrät anıñ bilgele ber fänni däräcäse bulırğa tieşlegen assızıqladı. “Rektor çit il keşese bula almıy, yağni ul Rossiäneke bulırğa tieş. Saadi şäyex Ğabderrazzaq as-Saadi (İordaniä universitetı professorı) kandidaturası xaqında küp süzlär buldı. Şunı täğäyen äytä alam: ul bulmayaçaq”, - dip açıqlıq kertte möfti.

Rektornı saylaw kümäk räweştä başqarılaçaq, çönki akademiä uçreditelläre isemlegendä, TR möselmannarı Diniä näzarätennän tış, Rossiä möselmannarı Diniä näzaräte häm Üzäk Diniä näzaräte dä bar.

İskärtep uzabız: 21 may könne "İzge Bolğar cıyını" qısalarında, Bolğar islam akademiäse nigezenä istälek qapsulası salındı, añarçı anıñ eçtälege uqıldı. İstälek qapsulası salınğanda, bar xalıq täqbir äytep tordı. Kiläçäk buınğa yullanılğan qapsula tatar, rus, ingliz häm ğäräp tellärendä yazılğan. RF Prezidentı Vladimir Putin tarafınnan xuplanılğan dini belem birü yuğarı uqu yortında ber ük waqıtta 300 läp keşe uqıy alaçaq. Bolar - kvalifikatsiälären kütärä torğan imamnar, 75-100 çaması magistr häm doktor. Akademiädä 5 kafedra eşlär dip niätlänä.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши