Millättäş

Tel beleme ölkäsendä kürenekle ğalimä Flera Safiullinanıñ tuuına – 78 yıl

Ul 300läp fänni, metodik xezmätlär avtorı, şularnıñ 70läbe – kitaplar

(Qazan, 24 may, “Tatar-inform”). Tel beleme ölkäsendä kürenekle ğalimä, üz waqıtında Qazan federal' universitetı professorı Flera Safiullinanıñ tuuına bügen - 78 yıl. 

Flera Sadri qızı Safiullina 1938 yılnıñ 24 mayında elekkege Sarman (xäzerge Tuqay rayonı) Telänçe Tamaq awılında tuğan. Başta tuğan awılında sigezyellıq mäktäptä uqıy. 1953 yılda, ätise Yaña Çürile rayonına (1956 yıldan Arça rayonı) eşkä cibärelü säbäple, ğailäläre belän şul rayonğa küçep kitälär. Flera şuşı rayonda urta mäktäpne tämamlağannan soñ, Qazan däwlät universitetınıñ tatar tele häm ädäbiäte bülegenä uqırğa kerä. Anı qızıl diplomğa tämamlap, universitetnıñ tatar tele kafedrasında eşli başlıy. Kürenekle tel ğalime Mirfatıyx Zäkiev citäkçelegendä 1962-1965 yıllarda aspiranturada uqıp, 1966 yılda “Tatar telendä süz tärtibe”digän temağa kandidatlıq, 2000 yılda “Tatar ädäbi tele sintaksisınıñ üseşe (XX ğasır)” digän temağa doktorlıq dissertatsiäse yaqlıy. 

Flera Safiullinanıñ böten eşçänlege Qazan däwlät universitetı belän bäyle. Ul 1992 yılğa qädär tatar tele kafedrasında başta assistent, annarı dotsent bulıp eşli. Ğalimä 1992-2008 yıllarda Qazan däwlät universitetınıñ tatar telenä öyrätü kafedrasın citäkli. Respublikabızda tatar telen däwlät tele bularaq ğämälgä kertü yünäleşendä zur xezmät quya. Ğalimä Berlinnıñ Azat universitetındağı (Germaniä) Türkologiä institutı belän xezmättäşlek itä, Xelsinkida tatar tele buyınça lektsiälär uqıy. 

Professor Safiullina - tatar tel belemeneñ üseşenä zur öleş kertkän ğalimä, 300läp fänni, metodik xezmätlär avtorı, şularnıñ 70läbe – kitaplar. Anıñ citäkçelegendä häm avtorlığında yuğarı uqu yortları, mäktäplär, kölliätlär, gimnaziälär öçen programmalar, däresleklär tözelä. Ul leksikoğrafiä, tatar telen çit tellär auditoriäsendä uqıtu metodikası yünäleşlärendä dä aktiv eşli. Flera Sadri qızı – köçle fänni mäktäben buldırğan ğalimä. Anıñ citäkçelegendä distädän artıq kandidatlıq häm doktorlıq dissertatsiäläre yaqlanğan. 

F.Safiullina – Tatarstan Respublikası mäğärifeneñ atqazanğan uqıtuçısı, Qayum Nasıyri isemendäge premiä iäse, Xalıqara Törek akademiäse äğzası, Tatarstan Respublikası Ministrlar Kabinetı qarşındağı Tellär turındağı Zakonnı ğämälgä aşıru komitetı äğzası, «Söyembikä», «Yalqın», «Mäğärif» jurnallarınıñ redkollegiäläre äğzası bula. Ul cämäğät eşleklese dä ide: 30 yıldan artıq akademik gruppalar quratorı, tarix-filologiä fakul'tetınıñ partiä bürosı äğzası häm särqätibe, şul uq fakul'tetnıñ profbürosı räise, fakul'tetnıñ stena ğäzetası redaktorı, saylaw komissiäse räise, Qazan däwlät universitetınıñ tatar telen ğämälgä quyu komissiäse äğzası buldı. Tatarstan Respublikası Prezidentı boyırığı belän Flera Safiullinağa “Tatarstan Respublikasınıñ atqazanğan fän eşleklese” digän isem birelde. 

Ğalimä 2011 yılnıñ 6 dekaberendä Qazanda wafat buldı.

 

 

 

 

 

 

 

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши