Millättäş

Kürenekle tatar ğalime, säyäsätçe, cämäğät eşleklese, Bötendönya tatar kongressın oyıştıruçılarnıñ berse İndus Tahirovka - 80 yäş

Ul eşlägän QFUda bügen şul uñaydan tantanalı utırış bula

(Qazan, 24 may, "Tatar-inform"). Kürenekle tatar ğalime, tarix fännäre doktorı, professor, säyäsätçe, Tatarstan Fännär akademiäse akademiğı, cämäğät eşleklese, Tatarstannıñ häm Rossiäneñ atqazanğan fän eşleklese, Tatarstan Respublikası Däwlät premiäse laureatı, Bötendönya tatarlar kongressınıñ Başqarma komitetı räise (1992-2002) bulğan İndus Riza ulı Tahirovka bügen 80 yäş tuldı. 

Tarixçı bularaq İndus Tahirovnıñ xezmätläre Rossiädäge inqıylablar häm milli xäräkätkä, Tatarstannıñ milli-däwlät tözeleşenä bağışlanğan. Ğalim berençelärdän bulıp milli faktornıñ Rossiäneñ säyäsi-ictimaği üseşenä iğtibar itä, borınğı zamannardan xäzerge waqıtqa qädär tatar xalqınıñ däwlätçelek tarixın kiñ yaqtırta. 

İndus Tahirov şulay uq Tatarstanda 90nçı yıllarda bulğan säyäsi-ictimaği üzgäreşlärdä zur rol' uynıy. Ul — tatar milli xäräkäteneñ äydäp baruçı ideoloğlarnıñ berse. Ul suverenitet turında Deklaratsiä, Tatarstan Konstitutsiäsen äzerläwdä häm qabul itüdä aktiv qatnaşa. 

Ğalim — Bötendönya tatar kongressın oyıştıruçılarnıñ berse, anıñ Başqarma komitetınıñ berençe räise. Ul tatar xalqınıñ milli-mädäni üseşenä zur öleş kertä, Tatarstannan çittäge cirle tatarlar häm diasporalar belän elemtälär urnaştıra. 

Tormış basqıçlarına küz salsaq, tumışı belän Leninoğorsk rayonı İske Şöger töbägennän bulğan İ.Tahirov Älmät şähärendä urta mäktäp tämamlap, 1963 yılda QDUnıñ tarix häm filologiä fakul'tetında, 1966 yılda QDU aspiranturasında uqıp çığa. 1966 yıldan başlap uqıta. 1967 yılda dissertatsiä yaqlap (Qazanda sovet xäkimiäte urnaşunıñ üzençälekläre analizlana), tarix fännäre kandidatı bula. 1979 yılda isä doktorlıq dissertatsiäsen yaqlıy. 1980 yıldan professor, QDU tarix kafedrası mödire. Tatarstan Respublikası xalıq deputatı, 1995 yılda Tatarstan Respublikası Däwlät Sovetı deputatı, 1992 yılnıñ iyül ayında berençe Bötendönya tatar kongressı Başqarma komitetı räise bularaq, 1997 yılda ikençe qorıltayda yañadan şul uq urınğa saylana. 

Xäzerge waqıtta Qazan federal' universitetınıñ Xalıqara mönäsäbätlär, tarix häm şäreqnı öyränü institutı professorı, akademik fän häm universitet belemen oyıştıruçı bularaq fän dönyasında ğomummäğlüm İndus Tahirovnıñ yübileyena bağışlap, bügen säğät 2dä QFUnıñ töp binasındağı Aqtlar zalında tantanalı utırış ütkärelä. Anda TR Däwlät Sovetı Räise Färit Möxämmätşinnıñ da qatnaşuı kötelä. 

 

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши