Din

R.Möxämmätşin: "Töp burıç - xänäfi mäzhäbe buyınça uqıtu öçen çittän möğallimnär çaqırsaq ta, eçtälek yağınnan üzebez tulılandıru"

Rossiä islam institutı rektorı assızıqlağança, köndäşlekkä sälätlelek burıçı ähämiätle

(Qazan, 24 may, "Tatar-inform", Gölnar Ğärifullina). Bolğar islam akademiäsendä belem biräçäk uqıtuçılar sostavı – möhim mäs'älä. Biredä oçraqlı keşelär bulmayaçaq. Bu xaqta bügen TR Ministrlar Kabinetında uzğan brifingta Rossiä islam institutı rektorı, TR möselmannarı Diniä näzaräte räise urınbasarı, TR möftie urınbasarı Räfıyq Möxämmätşin belderde. 

“Bolğar islam akademiäsen tözü niäte tuğaç, anıñ, älbättä, möselman yuğarı uqu yortı bulaçağı küzdä totıldı, - dip, Räfıyq Möxämmätşin Rossiädä 10 nan artıq islam vuzı buluın şärexläde. – Tik, berençe çiratta, anıñ islam fännäreneñ magistrları häm doktorların äzerläyäçäk uqu yortı bularaq eşläwen nigezgä quydıq”. Rektor bilgeläp uzğança, akademiäneñ Rossiä islam beleme sistemasına layıqlı töstä kerüe zarur. “Zamança dini belem digändä, iñ berençe köndäşlekkä sälätlelek ähämiäte kilep basa, yuqsa, mondıy mähabät bina tözüneñ mäğnäse dä yuq”, - dide R.Möxämmätşin. Anıñ süzlärenä qarağanda, bezdä dini belem yünäleşendä äzerlängän baqalawrlar xäzer küp kenä möselman illärendä ğilem esti. 

Räfıyq Möxämmätşin süzlärenä qarağanda, akademiädä klassik islam yünäleşläre ğämäldä bulaçaq – islam xoquqı, Qor'änne, xädislärne öyränü. Şunı da bilgeläp uzarğa kiräk: belem barı tik din qısalarında ğına birelmäyäçäk. “Belem birü sisteması bügenge kön taläplärenä turı kilergä tieş, şuña kürä çığarılış studentlarınıñ tel häm dini täğlimatçılar mirası buyınça bay belemle buluı möhim. Menedjment häm islam iqtisadı, tatar tele häm milli mädäniät kafedraları da bulaçaq”, - dide ul. 

"Älbättä, traditsion islam yünäleşendä xänäfi mäzhäbe buyınça döres belem birerlek uqıtuçılar kiräk. Süriä, İordaniä, Marokqodan zur belgeçlär, din ähelläre, täğlimatçılar kötelä. Alar belän berniçä kileşü inde tözelde. Respublika Prezidentı tarafınnan da şundıy färman birelde – bez berençe könnän ük yuğarı äzerlek däräcäse turında uylarğa tieş, yuqsa, köndäşlekkä sälätlelek burıçın xäl itep bulmayaçaq”, - dip assızıqladı Räfıyq Möxämmätşin. Anıñ süzlärennän añlaşılğança, tözeleş belän parallel räweştä, belem birü programmaların formalaştıru yünäleşendä eş alıp barılaçaq. Ağımdağı yıl azağına qädär Rossiä çınbarlığına yaraqlaştırılğan, ämma xalıqara taläplärgä cawap birgän belem birü programmaların äzerläw burıçı tora. 

“Bezneñ töp burıç - xänäfi mäzhäbe buyınça uqıtu öçen çittän möğallimnär çaqırsaq ta, eçtälek yağınnan üzebez tulılandıru. Ni öçen digändä, xalıqtan “bu uqu yortın monda tözüneñ mäğnäse nidä, çit ildä dä şulay uq uqıp bulır ide digän sorawlar” bulu mömkin. Bez Rossiä mänfäğätlärenä cawap birgän belgeçlär äzerlärgä tieşbez", - dip bilgeläp ütte Räfıyq Möxämmätşin. 

 

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши