Din

Bolğar islam akademiäsendä belem öçen tüläw forması älegä bilgelänmägän

Berençe çorda uqu buşlay buluı ixtimal

(Qazan, 24 may, “Tatar-inform”, Gölnar Ğärifullina). Bolğar islam akademiäsendä beryulı 300 keşe yäşi alaçaq. Bu xaqta bügen TR Xökümäte yortında yuğarı uqu yortı tözelügä bağışlanğan brifingta Rossiä islam institutı rektorı, TR möftie urınbasarı Räfıyq Möxämmätşin belderde. 

Spiker akademiädä beryulı küpme keşe belem alaçağı turındağı sorawğa cawap birep: “Bez san artınnan qumayaçaqbız. Yıl sayın uqu yortı islam fännäreneñ 15 läp magistrın häm 10 doktorın äzerläp çığaraçaq, şul räweşle daimi uquçılar sanı barlığı 75-100 läp keşe täşkil itär dip niätlänä. Ämma, akademiä bulğaç, biredä imamnar, diniä näzarätläreneñ yuğarı sostavı, möğallimnär öçen kvalifikatsiä kütärü kursları, törle konferentsiälär oyıştırılaçağın da isäptä totarğa kiräk”, - dide. Räfıyq Möxämmätşin äytüençä, barlıq çaralarnı isäpkä alğanda, akademiä 300 läp keşene sıydıra alaçaq. 

Studentlarğa akademiädä belem öçen tüläw forması älegä bilgelänmägän. “Akademiä qızıqsındırırlıq bulsın öçen, brendnı kiñräk taratırğa kiräk. Älbättä, berençe çorda uqu öçen nindider zur summalar bulmayaçaq”, - dide Räfıyq Möxämmätşin häm baştağı waqıtlarda buşlay uqu ixtimalın da inqär itmäde. Anıñ äytüençä, uqıtunıñ nindider formatı sentäber ayında ğämälgä quyılaçaq, tözeleş eşläre belän parallel räweştä, anıñ abiturientlar äzerläwgä qağılışlı buluı mömkin. R.Möxämmätşin studentlarnıñ ğäräp telen belü şartın da iskärtte. 

Akademiäneñ mäydanı 1,7 gektardan artıq bulıp, ul "Aq mäçet"tän könyaq-könçığışqa taba 300 metr yıraqlıqta urnaşaçaq. Bolğar islam akademiäse proyektı törle illärdä berniçä uqu yortın qarap, şulardan urtaq ber proyekt tözep barlıqqa kilgän.

 

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши