Iqtisad

Röstäm Miñnexanov yänä «Tatnefteximinvest-xoldinğ» Direktorlar sovetı räise buldı

Kompaniä aktsionerları cıyılışı 2015 yıl öçen diwidendlar tülämäskä qarar kitte

 (Qazan, 25 may, «Tatar-inform», Anwar Malikov). Bügen TR Xökümäte yortında Tatarstan Prezidentı Röstäm Miñnexanov räislegendä «Tatnefteximinvest-xoldinğ» AAC aktsionerlarınıñ yıllıq cıyılışı uzdı.

2015 yılda «Tatnefteximinvest-xoldinğ» eşçänlekneñ töp yünäleşläre buyınça eşläwne däwam itte, dip belderde xisap dokladında kompaniäneñ general' direktorı Rafinat Yarullin. İnvestitsion häm innovatsion proyektlarnı tormışqa aşıruğa yärdäm itelgän, çittän kertelgän tawarlarnı üzebezdä citeşterelgännärenä almaştıruğa zur iğtibar birelgän. Xoldinğ belgeçläre tarafınnan ber yılda 19 yünäleş buyınça bazarlarğa marketinğ küzätüe başqarılğan. «Tatnefteximinvest-xoldinğ» fänni-texnik sovetınıñ 13 utırışı uzğan. Neft häm ğaz tabu häm eşkärtüneñ näticälelegen arttıru, yaña ximiä produktları häm rezin eşlänmälär alu, qaldıqlarnı eşkärtü texnologiäläre qaralğan.

Tulayım alğanda, 2015 yıl näticäläre buyınça Tatarstan neft-ğaz-ximiä kompleksında citeşterü küläme 2,5 protsentqa artqan. Bu programmada qaralğan kürsätkeçtän kimräk, dip bilgeläp ütte R.Yarullin.

Uzğan yıl näticäläre buyınça «Tatnefteximinvest-xoldinğ» 1 mlrd 156 mln sum saf tabış alğan. Aktsionerlar diwidendlar tülämiçä, böten saf tabışnı kompaniä üseşenä totarğa digän qarar qabul itte.

Cıyılışta 25 keşedän torğan yaña Direktorlar sovetı saylandı. Aña yänä Röstäm Miñnexanov, TR Premyer-ministrı İldar Xalikov, TR Premyer-ministrı urınbasarı - sänäğät häm säwdä ministrı Albert Kärimov, TR iqtisad ministrı Artem Zdunov, TR Prezidentı yärdämçese Renat Sabirov, TR Prezidentınıñ neft sänäğäte buyınça yärdämçese Şäfäğät Täxautdinov, TR Prezidentınıñ neft häm neft-ğaz çığanaqların eşläw mäs'äläläre buyınça konsultantı Renat Möslimov, TR Premyer-ministrınıñ neft-ğaz-ximiä kompleksı mäs'äläläre buyınça yärdämçese Almaz Ğäliev, TR İnvestitsion üseş agentlığı citäkçese Taliä Miñnullina kerde.

Sovetta respublikanıñ qayber ere kompaniäläre citäkçeläre, şul isäptän «Swäzyinvestneftexim» general' direktorı Valeriy Sorokin, "Tatneft" general' direktorı Nail Mağanov, "TAİF" general' direktorı Albert Şihabetdinov,saylandı.

Yañartılğan Direktorlar sovetı cıyılışınnan soñ, Röstäm Miñnexanovnı räis itep sayladı häm Rafinat Yarullinnıñ «Tatnefteximinvest-xoldinğ» general' direktorı sıyfatındağı wäqälätlären ozayttı. Yarullinnı täqdim itep, Miñnexanov anı "bezneñ ostaz" dip atadı.

Fotosurät prav.tatarstan.ru saytınnan alındı.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши