Qazan xäbärläre

Qazanda soñğı qıñğıraw çıñladı

Bıyıl Tatarstan başqalasında 5,5 meñ uquçı 11 nçe sıynıfnı tämamlıy

 (Qazan, 25 may, «Tatar-inform», Alsu Safina). Bügen Qazanda Kreml yar buyında soñğı qıñğıraw çıñladı.

İskärtep ütik: bıyıl Tatarstan başqalasında 5,5 meñ uquçı 11 nçe sıynıfnı tämamlıy.

Elegräk xäbär itelgänçä, bäyräm çarasın “Berençe qanal” da «Veçerniy Urğant» tapşıruında «Ostrıy reportaj» rubrikasın täqdim itüçe Alla Mixeyeva alıp bardı.

“Bügenge bäyräm - berençedän, şatlıqlı, ikençedän – moñsu, - dip bilgeläp ütte TR vitse-premyerı – mäğärif häm fän ministrı Engel Fättaxov. – Bügennän sez üz yazmışığıznı üzegez bilgeläyäçäksez, sezgä uñışlar telibez”, - dide. Anıñ süzlärençä, çığarılış sıynıf uquçıları nindi genä yul saylasa da, kiläçäktä alarnıñ yaratqan eşe bulırğa tieş.

Ministr şähär citäkçelegenä, Qazannıñ mäğärif idäräsenä, direktorlar korpusına häm uqıtuçılarğa räxmät süzlären citkerde. “Respublika mäğärifeneñ üseş strategiäsen Qazan mäğärif sisteması bilgeli”, - dip assızıqladı E.Fättaxov. Ul çığarılış sıynıf uquçıları arasında bötenrossiä olimpiadalarında, sport yarışlarında, üzeşçän sänğät konkurslarında ciñüçelär buluına iğtibarnı yünältte.

Säxnädän Qazannıñ äydäp baruçı vuzları rektorları häm “TR Yıl uqıtuçısı-2016” konkursında absolüt ciñüçese, Sovet rayonı 90 nçı gimnaziäneñ tarix häm cämğiät beleme uqıtuçısı İvan Filatov çığarılış uquçılarına uñışlar telädelär.

Mäktäpne tämamlawçılar soñğı mäktäp wal'sın başqardılar, annarı alarnı Qazan merı İlsur Metşin sälämläde. “Bügen barıbız - çığarılış sıynıf uquçıları, uqıtuçılar, mäktäp direktorları häm ata-analar öçen dä dulqınlandırğıç kön, - dide şähär merı. – Sezneñ alda zur tormışqa işeklär açıla. 11 yıl - mäktäp yılları artta qaldı”.

“Mer, qızı 11 nçe sıynıfnı tämamlawçı ata bularaq, uqıtuçılarğa 11 yıl buyı mäxäbbätegezne häm professional'legezne qızğanmağanığız öçen räxmät belderäm, balalarnı häm eşegezne yarattığız, alarnıñ talantların açu öçen barısın da eşlädegez, - dip bilgeläp ütte İ.Metşin. - Şuşı yıllar däwamında sez bezne, ata-analarnı häm uqıtuçılarığıznı, uñışlarığız belän şatlandırdığız. 11 yıl elek sezneñ belän bergä “berençe sıynıfqa bardım” – 2015 yılnıñ noyäberendä Qazan merı buldım”,- dide ul uquçılarğa möräcäğät itep.

Annarı säxnädän soñğı qıñğıraw çıñladı, hawağa törle töstäge şarlar yul aldı. Çara kontsert programması belän däwam itte.

Bilgeläp ütik: 27 mayda çığarılış sıynıf uquçıları BDİ tapşıra başlıy. Berençe imtixannar - geografiä häm rus ädäbiäte buyınça.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши