Cämğiät, Millättäş

“Millätebez xäzinäläre” bıyıl ike smenada uzaçaq

Berençese anıñ iyün başında uq eşen başlıy

 (Qazan, 27 may, “Tatar-inform”, Liliä Lokmanova). 1-9 iyün könnärendä Qazannıñ Petrovskiy bistäsendä urnaşqan “Regina” balalar sälämätländerü lagere bazasında “Millätebez xäzinäläre” profille smenası eşläyäçäk. Anı TR Yäşlär eşläre häm sport ministrlığı, “İdel” yäşlär üzäge, Tatar federal' milli-mädäni avtonomiäse oyıştıra.

Bu xaqta bügen “Tatar-inform” MA general' direktorı Şamil Sadıyqov uzdırğan matbuğat konferentsiäsendä bilgele buldı. Jurnalistlar belän oçraşuda RF FCnıñ DD deputatı, Tatar federal' milli-mädäni avtonomiäse sovetı räise İldar Ğilmetdinov, “İdel” yäşlär üzäge direktorı Läysän Safina qatnaştı.

Läysän Safina xäbär itüençä, smenada 11 töbäktän barlığı 60lap bala kiläçäk. Alar arasında Ulianovsk, Räzan', Ästerxän, Mäskäw, Tübän Novgorod ölkäläre, Perm krayı, Başqortstan, Komi, Mariy El, Mordoviä Respublikaları häm Tatarstannan balalar bar. Smenağa kilüçelärneñ küpçelege 10-16 yäşlek, ämma alar yaqın tuğannarı, abıy-apaları belän kilä ikän, ul oçraqta 7-8 yäşlek balalarnı da qabul itälär.

İldar Ğilmetdinov bilgeläp ütkänçä, smena, kübräk, tatar telen öyrätü, balalarda ana telenä qarata mäxäbbät uyatu maqsatınnan, oyıştırıla. Monıñ öçen maxsus “Anam tele — küñelem tele” dip isemlängän däreslek eşlänelgän. Ul tatar, rus, ingliz tellärendä yazılğan, şulay uq däreslekkä quşımta bularaq audiodäreslär dä bar.

Tatar tele däreslären lagerda yal itüçe balalar teoriä yağınnan ğına tügel, ğämäli yaqtan da üzläşteräçäk. Soñraq belemnär total' diktant belän nığıtılıp, alar başqarğan künekmälär cıynalğan papka balalarnıñ ata-analarına yullanaçaq. “Bilgele inde, 10-14 kön eçendä genä tatar telen öyränep bulmıy. Şuña da bez äti-änilärne kön sayın balaları belän tatarça söyläşergä öndibez”, - dide Läysän Safina. Anıñ süzlärençä, lagerda yal itü 5,6 meñ sum tora. Yul çığımnarı da äti-äni cilkäsenä töşä. Kiläçäktä smenada yal itü bäyäsen kimetü buyınça eş alıp barıla.

Belem birüçelärgä kilgändä, balalarğa tatar telen äydamannar öyrätä, törle master-klasslar uzdıra. Şuña da älege smenağa äydamannarnı qabul itkändä alarnıñ tatar telen bik yaxşı belüne taläp itep quyabız, dip xäbär itte “İdel” yäşlär üzäge wäkile.

Älege smena tämamlanğannan soñ, “İdel” yäşlär üzägendä ikençe smena uzdırılaçaq. Anda barlığı 180 bala qatnaşuı kötelä. Läysän Safina xäbär itüençä, äle bu smenalardan tış ta 50 dän artıq zayavka bar. Şuña mondıy smenalar niçä tapqır ütkärelsä dä, artıq bulamayaçaq, dip sanıy “İdel” yäşlär üzäge direktorı. “Bez älege smenalarnı Tatarstanda ğına tügel, ä çit töbäklärgä dä çığıp, anda da uzdırılırğa tieş. Saratov häm Ulianovskida tatar balaları liderlar mäktäbe oyıştırıldı. Bıyıl isä “Millätebez xäzinäläre” Udmurtiädä häm berençe tapqır Novosibirsk ölkäsendä ütäçäk”, - dip xäbär itte ul.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши