Cämğiät

Törki dönya jurnalistları Urta Aziädä oçraştı

Qırğızstan häm Qazaqstanda ütkärelgän mediakongressta Tatarstan jurnalistı da qatnaştı

(İstanbul, 28 may, “Tatar-inform”, Ruşaniä Altay). Törki dönyanıñ yäş jurnalistları Urta Aziädä oçraştı. 19-24 may könnärendä törki cömhüriätlärdän kilep, Törkiä universitetları kommunikatsiä fakul'tetlarında uquçılar häm älege uqu yortların tämamlap, jurnalist bulıp eşläwçelärneñ “VIII kiläçäk belän elemtä” mediakongressı bulıp ütte. Anıñ berençe öleşe Qırğızstannıñ Bişkäk häm Çolpan-Ata şähärlärendä, ikençe öleşe Qazaqstannıñ Almatı qalasında oyıştırıldı. Çarağa Azärbaycan, Bolğariä, Ğretsiä, Qazaqstan, Kosovo, Qırğızstan, Qırım, Moldova, Serbiä, Tacikstan, Törkiä, Üzbäkstan kebek 16 ildän barlığı 53 keşe qatnaştı, şul isäptän Tatarstannan - jurnalist Ruşaniä Altay. Ul älege forumğa, törki cömhuriätlärdän kilep, Törkiä universitetlarınıñ kommunikatsiä fakul'tetın tämamlawçı berençe “qarlığaç” bularaq çaqırıldı. 

Möhacirlek yazmışına bağışlanğan “VIII kiläçäk belän elemtä” cıyınınıñ açılu tantanası Bişkäktäge “Manas” isemendäge Qırğız-törek universitetında ütkärelde. “Keşe xoquqları nigezendä möhacirlek problemalarınıñ media-kiñlektä yaqtırtıluı” dip atalğan berençe utırışta Bolğariä, Ğretsiä, Makedoniä, Serbiä, Törkiä wäkilläre çığış yasadı. İkençe utırış Issıq kül buyında oyıştırıldı. Anda Bosniä-Gertseğövina, Serbiä, Törkiädän kilgän jurnalistlar “Moxit häm tarix” temalarına dokladlar uqıdılar. Utırıştan soñ qunaqlar öçen Çolpan-Ata şähäreneñ muzeyları, tarixi urınnarı belän tanıştıru çarası ütkärelde. Yäş jurnalistlar şulay uq Issıq kül buyına urnaşqan Çıñğız Aytmatov isemendäge “Rux ordo(ruxi märkäz)” parkına qayın ağaçları utırttılar, Bişkäk - Çolpan-Ata yulı östendä, Çu yılğası buyında urın alğan tarixi Burana manarasın tamaşa qıldılar. Qunaqlar şunda uq Qırğızstan mädäniät ministrlığı wäkilläre qatnaşında borınğı «Qotadğu beleğ» (İgelekle belem) äsäreneñ avtorı, Yosıf Balasağuni bularaq belengän ädip Yosıf Xas Xacirne, tuuına 1000 yıl tulu mönäsäbäte belän, iskä alıp üttelär. Anıñ danlıqlı äsärläre xaqında studentlar tarafınnan äzerlängän dokladlar tıñlandı. Programma Qaraxanidlarnıñ borınğı Balasağun şähäre bulğan urındağı balballarnıñ tarixın tanıtu belän däwam itte. Şul könneñ irtänge säğätlärendä isä qunaqlar dönyaküläm tanılğan qırğız yazuçısı Çıñğız Aytmatovnıñ qäberen ziärät itep, ruxına doğa qıldılar. 

“VIII kiläçäk belän elemtä” cıyınınıñ ikençe öleşe Qazaqstannıñ Almatı şähärendä ütte. Äl-Farabi isemendäge kazak milli universitetında “Möhacirlek, ana häm bala” temasına qağılışlı dokladlar yañğıradı. Anda Ruşaniä Altay, Tatarstannı täqdim itep, tatar tarixında möhacirlek häm däwlät bäysezlegeneñ ähämiäte turında çığış yasadı. 

Cıyın barışında törki dönyanıñ bulaçaq jurnalistları “Video”, “Gäcit” häm “Grafika” törkemnärenä bülenep möhacirlek mäs'älälären yaqtırtqan videoroliklar häm sotsial çeltärlärgä taratu öçen slayd-şou äzerlädelär, cıyın belän bäyle gäcit çığardılar. Alarnıñ xezmätläre cıyınnıñ yabılu tantanasında qunaqlarğa täqdim itelde. 

“VIII kiläçäk belän elemtä” cıyınında tübändäge qararlar qabul itelde: 

1) törki cömhuriätlärneñ kommunikatsiä yäki jurnalistika fakul'tetı studentları tarafınnan törki tellärdä xezmät kürsätäçäk internet portal buldıru; 

2) törki dönyanıñ xäzerge zaman ädipläre, ğalim häm fiker iälärenä xörmät bilgese bularaq, alarnıñ isemnären härtörle icadi platformlarğa birü; 

3) cıyında qatnaşqan studentlarnıñ video, slayt-şou häm ğäzeta kebek xezmätlärennän kiñ faydalanu; 

4) cıyında barlıqqa kilgän ruxi berlekne yıl buyına däwam itü häm çaqırılıp ta, tege yäki bu säbäp belän qatnaşa almıy qalğan studentlarnıñ xezmätlärennän faydalanunı tä'min itü; 

5) kiläçäktä kommunikatsiä yäki jurnalistika fakul'tetlarınıñ üzara bağlanışlarına buldıru. 

“VIII kiläçäk belän elemtä” cıyını qısalarında “Anadolu” xäbär agentılığı tarafınnan äzerlängän “Möhacirlär” digän fotosurät kürgäzmäse täqdim itelde. Anıñ açılışı häm Bişkäk häm Almatı programmalarında çittän kilgän häm cirle qunaqlar qatnaşında tantanalı töstä uzdı. 

Cıyın Törkiä teleradio yuğarı qorılışı initsiativası nigezendä Ministrlar Kabinetı, Törki dönya meriäläre berlege, TÖRQSOY, “Anadolu” xäbär agentlığı”, “Awaz” Törkiä däwlät teleradio qanalı, TİKA (törek xezmättäşlek häm koordinatsiä agentlığı idäräse) kebek qorılışlarnıñ bulışlığı belän oyıştırıldı. 

Cıyınğa 80 keşeneñ qatnaşuı kötelä ide, läkin Qırğızstan häm Qazaqstan Äfğanstan, Ğıyraq, İran, Tacikstan kebek illärdän kilüçe törki studentlarğa çik uzu vizası birmäde. 

“VIII kiläçäk belän elemtä” cıyını yäşlärneñ törki tellärdä cırlı-biüle küñel açu programması belän tögällände.

 

 

 

 

 

 

 

 

 

 

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши