Millättäş

Tatar xalqınıñ etnik çığışın, İdel buyı Bolğarı, Qazan şähäre tarixın, Ural töbägen öyrängän ğalim Alfred Xalikov tuğan kön

“Kem bez, bolğarlarmı, tatartarmı? Qto mı — bulğarı ili tatarı?”, “500 russkix familiy bulğaro-tatarskoğo proisxojdeniä” h.b. xezmätlär avtorı ul

 (Qazan, 30 may, “Tatar-inform”). “Kem bez, bolğarlarmı, tatartarmı? Qto mı — bulğarı ili tatarı?”, “500 russkix familiy bulğaro-tatarskoğo proisxojdeniä”, Urta İdel buyı borınğı tarixı; mongollar, tatarlar, Altın Urda häm Bulğariä turında (“Drevnäya istoriä Sredneğo Povoljya”, “Mongolı, tatarı, Zolotaya Orda i Bulğariä”), ğomumän, tatar xalqı tarixı buyınça bik küp xezmätläre belän cämğiätebezneñ küzen açqan, ğalim bularaq nigezle fikeren citkergän sovet häm Rossiä tarixçısı, arxeoloğ Alfred Xalikovnıñ tuuına bügen 87 yıl tuldı.

Alfred Xäsän ulı Xalikov (1929-1994) TASSRnıñ Çistay qantonı Kizläw (Qurmanayevo) awılında (xäzer awıl Nurlat rayonına kerä) tuğan.

1947 yılda urta mäktäpne Qazanda tämamlağaç, Qazan däwlät universitetınıñ tarix-filologiä fakul'tetına kerä häm 1952 yılda bik yaxşı bilgelärgä tämamlıy. Äle student waqıtınnan uq 1951 yıldan SSSR FA Qazan filialı Tel, ädäbiät häm tarix institutında, 1962-1965 yıllarda institutnıñ direktor urınbasarı, 1965-1988dä arxeloğoiä bülege mödire, 1990 yıldan baş fänni xezmätkär bularaq 30 yıldan artıq xezmät quyğan häm 200dän artıq fänni eş bastırğan oluğ ğalim ul. Ber ük waqıtta 1968 yıldan Qazan universitetı professorı. TR Fännär akademiäseneñ möxbir-äğzası, tarix fännäre doktorı, TASSRnıñ atqazanğan fän eşleklese.

Şul räweşle, laboranttan fän doktorına, professorğa qädär yul uza. Berençe bulıp N.F.Kalinin belän berlektä, Qazan yanı kul'turası häm İdel-Çulman buyı kul'turasın taswirlıy. Xezmätläre İdel buyı häm Ural töbäge arxeologiäsenä, borınğı häm urta ğasırlar tarixına, şul isäptän tatar xalqınıñ etnik çığışına, İdel buyı Bolğarı, Qazan şähäre tarixına qarıy. İdel buyı xalıqlarınıñ etnik tarixınnan uqu yärdämlekläre avtorı. Anıñ tırışlığı belän Qazan universitetında arxeologiä muzeye torğızıluın da bilgeläp ütü urınlı.

Wafatınnan soñ, Alfred Xalikov TRnıñ fän häm texnika ölkäsendä Däwlät büläge laureatı bula. TR Fännär akademiäseneñ Arxeologiä institutı A.X.Xalikov isemen yörtä. Anıñ xörmätenä “Xalikov uquları” fänni konferentsiälär uzdırıla.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши