Awil xucaliği

Marat Äxmätov ağrariylarnı terlek azığı äzerläwgä kübräk iğtibar birergä öndi

TR awıl xucalığı häm azıq-tölek ministrı töp eşlärne 15 iyüngä qädär tämamlaw burıçı quydı

 (Qazan, 30 may, «Tatar-inform», Arseniy Mawrin). Çäçü eşläre tämamlansa da, mäşäqät kimemäde. Xäzer böten iğtibarnı terlek azığı äzerläwgä birergä kiräk. TR Premyer-ministrı urınbasarı - awıl xucalığı häm azıq-tölek ministrı Marat Äxmätov şuña öndäde.

Bügen TR Xökümäte yortında respublika Prezidentı Röstäm Miñnexanov räislegendä videokonferentsiä rejimında uzğan kiñäşmädä profille ministrlıq citäkçese berençe qat peçän çabunı 15 iyüngä qädär tämamlaw burıçın quydı.

"Tatarstanda hawa torışı şartları uzğan yılğı kebek: berniçä kön däwamında yawım-töşemnärsez esse hawa saqlana", - dip borçuın belderde Marat Äxmätov.

Yañğırlar bulmaw çäçüleklärgä naçar tä'sir itärgä mömkin. "Dım saqlaw çaraların aktivraq başqaru zarur", - dip assızıqladı ministr.

Terlek azığı äzerläw turında söylägändä, ministr küpyıllıq ülännärneñ aktiv räweştä massa tuplawın bilgeläp ütte. "Üsemleklär täwlegenä 5 santimetrğa üsä. İñ möhime - waqıtnı quldan ıçqındırmaw. Xäzer quzaqlı kul'turalarda protein küläme 25 protsentqa qädär täşkil itä. Ber atnadan soñ ul 15 protsentqa qalaçaq", - dide M.Äxmätov.

"Yıl sayın qayber xucalıqlar terlek azığın äzerläwne soñğa qalıp başlıy", - dip assızıqladı ul. Leningrad ölkäse agroxucalıqlarınnan ürnäk alırğa kiräk. Alar texnikanı çıq belän - tönge säğät 2lärdä ük çığara häm peçän çabu uñaylı temperaturada başqarıla.

"Älegä respublikada terlek azığı äzerläw tizlege yuğarı tügel, - dip assızıqladı çığış yasawçı, - 25,3 gektar mäydanda çabılğan, 5,1 meñ tonna peçän häm 42,8 meñ tonna senaj äzerlängän", - dide ul.

Liderlar arasında - Aqtanış, Zäy häm Biektaw rayonnarı. Alar terlek azığı äzerläwne waqıtında başlağan.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши