Cämğiät

Qazanda belgeçlär xökem itelgännärne din aşa tärbiäläw, psixologiälären üzgärtü turında fiker alıştı

Utırışta bilgeläp ütelgänçä, xökem itelgännärneñ üze telägän dinne totuı öçen barlıq şartlar tudırılğan

 (Qazan, 30 may, “Tatar-inform”, Gölnar Ğärifullina). Bügen RF Yustitsiä ministrlığınıñ TR buyınça idäräse qarşındağı koordinatsion sovet utırışı uzdı. Anı RF Yustitsiä ministrlığınıñ TR buyınça idäräse başlığı Viktor Demidov alıp bardı.

Kön tärtibenä xökem itelgännärne tözätü uçrejdenielärendä tözätü protsessın oyıştıru mäs'äläse buyınça Cäzalarnı ütätü federal' xezmäteneñ TR buyınça idäräseneñ TR möselmannarı Diniä näzaräte häm Rus Pravoslovie Çirkäweneñ Tatarstan mitropoliäse belän üzara xezmättäşlegen kamilläşterü, TRda 2013-2015 nçe yıllarda nikaxnı özü turında aqtlar terkäleşe dinamikası häm, Rossiä häm TRda cämäğät sudiaları tarafınnan nikaxnı özü turındağı eşlärne qarağanda, medaitiv texnologiälär qullanılış täcribäse kebek temalar quyılğan ide. Alarnı qaraw barışında tözätü uçrejdenielärendä xökem itelgännärne tözätü protsessın oyıştıru häm TR da ğailä mediatsiäse xezmätlären üsterü kebek mäs'älälär kütärelde.

Utırışta Cäzalarnı ütätü federal' xezmäteneñ TR buyınça idäräse başlığı Däwfit Xämädişin, TR möselmannarı Diniä näzaräte räise urınbasarı – sotsial' proyektlar yünäleşe citäkçese İldar xäzrät Bayäzitov, Qazan häm Tatarstan mitropolitı Feofan, TR möselmannarı Diniä näzaräte räise urınbasarı Röstäm Xäyrullin, TR Ministrlar Kabinetınıñ grajdanlıq xäle aqtların terkäw idäräse başlığı Albina Şäwälieva, TRda Keşe xoquqları buyınça wäqälätle Säriä Saburskaya, TR Yuğarı sudı räiseneñ grajdanlıq eşläre buyınça urınbasarı Marat Xäyrullin häm başqalar qatnaştı.

Cäzalarnı ütätü federal' xezmäteneñ TR buyınça idäräse başlığı urınbasarı Rafael Däwliev soñğı un yılda RF dä cinäyätçelek 9 protsentqa, şul isäptän Tatarstanda 16,3 protsentqa artuın şärexläde. Ul respublikada pravoslavie häm möselman ömmäte mänfäğätlären bertigez qayğırtuğa yünälderelgän säyäsät alıp barıluın assızıqladı. Anıñ fikerençä, Rossiädä törle dini qaraşlar bergä yäşägän bütän mondıy töbäkne oçratu qıyındır. “2000 nçe yıllar başında tözätü uçrejdenielärendä üz cäzasın alğan xökem itelgännärneñ eş belän mäşğüllege mäs'äläse kisken tora ide. Bu problemanı xäl itü maqsatı belän, Cäzalarnı ütätü xezmäteneñ TR buyınça idäräse citäkçelege dini yünäleşkä citdi iğtibar yünältergä niätli. Çirkäwlär, mäçetlär tözelä, din ähelläre belän xezmättäşlek cayğa salına”, - dip bilgeläp uzdı Rafael Däwliev. Ul respublikağa imam sıyfatında psevdoislam ağımnarı tarafdarları ütep kerep, traditsion islamnı qaqşatırğa teläwläre turında äytte. R.Däwliev ağımdağı yıl başında Räzan' şähärendä Cäzalarnı ütätü xezmäte tarafınnan vedomstvonıñ territorial' orğannarı başlıqlarınıñ din totuçılar belän eşläw buyınça yärdämçeläre öçen kurslar oyıştırılğanın şärexläde.

Rafael Däwliev assızıqlap ütkänçä, xökem itelgän zatlarnıñ üze telägän dinne totuı öçen, Cäzalarnı ütätü xezmäteneñ TR buyınça idäräse citäkçelege tarafınnan barlıq şartlar tudırılğan. Tatarstannıñ barlıq tözätü oyışmalarında Allah yortları, ğibadätxanä bülmäläre tözelgän. Barlığı 7 mäçet, möselmannar öçen 5 ğibadät qılu bülmäse häm 8 çirkäw, rus çirkäwläreneñ 5 ğibadät qılu bülmäse isäplänä. 16 pravoslavie häm 15 möselman cämğiätläre oyışqan.

R. Däwliev tözätü uçrejdenielärendä barlıq dini oyışmalarnıñ videoküzätü sisteması belän cihazlanğanın bilgeläp uzdı. “TR möselmannarı Diniä näzaräte belän berlektä, xökem itelgännärneñ mäçetlärdä üz-üzlären totu qağidälären eşlädek”, - dip belderde ul.

Mitropolit Feofan tözätü uçrejdenieläreneñ keşe psixologiäsen üzgärtügä, naçar fikerlären uñayğa boruğa yünälderelgän bulırğa tieşlegenä basım yasadı. “Bu ciñel mäs'älä tügel. Keşeneñ zakonnıñ aña qarata “qızıl töskä yul çığuı” arqasında qullanıluın añlaw möhim. Bu nisbättän dini yünäleş buyınça eş alıp barunıñ ähämiäte zur. Keşe anıñ cawaplılığı cäzanı ütäw däwamında ğına tügel, ä ğömerlek cawaplılıq buluın añlarğa tieş”, - dip belderde Feofan. Ul reabilitatsiä, resotsializatsiä mäs'älälärenä tuqtaldı. Şulay uq, Cäzalarnı ütätü idäräse häm dini konfessiä wäkilläre kergän eşçe törkem buldırırğa täqdim itte.

İldar xäzrät Bayäzitov tözätü uçrejdenielärendä mäçetkä yörüçe 600 lap keşe isäplänüen äytte. “Alar üzläreneñ dini wazifaların üti alsın öçen, barlıq şartlar tudırılğan”, - dide ul. Anıñ fikerençä, här tözätü uçrejdenieseneñ wäğäz söyli alırlıq üz imamı bulırğa tieş. Bu nisbättän, imamnarğa bu eş öçen tüläw mäs'äläse quzğatıldı. Rafael Däwliev äytüençä, din ähelläreneñ atnasına, kim digändä, ike tapqır kilüe ciñellärdän tügel, şuña kürä, älbättä, imamnarnı matdi yaqtan qızıqsındıru zarur.

İldar xäzrät şulay uq, Cäzalarnı ütätü xezmäte belän kileşterep, tözätü uçrejdenielärenä ädäbiät kiterelüen dä bilgeläp ütte. Şulay uq, Ramazan ayında bulsa da, xäläl tuqlandırunı oyıştıru mäs'äläse kütärelgänen äytte.

“Sotsial' reabilitatsiä häm adaptatsiä üzäge” kommertsiäle bulmağan oyışması general' direktorı Azat Ğaynetdinov, xökem itelgännär cäzasın ütäp irekkä çığarılğaç, alarnıñ cämğiätkä yaraqlaşuı, üzlären kiräkle itep toyuları problemasına tuqtaldı. “İrekkä çığıp, küp keşe toraqsız, eşsez bula, şaqtıy ğına waqıt üz-üzen taba almıy, şuşı çorda ekstremizmğa yul açıla, alar sektantlar öçen äzer produktqa äylänä”, - dide üze dä irektän mäxrüm itü urını aşa uzğan Azat Ğaynetdinov.

Bügenge utırış qısalarında, Cäzalarnı ütätü federal' xezmäteneñ TR buyınça idäräse, TR möselmannarı Diniä näzaräte häm Tatarstan mitropoliäse belän, TR territoriäsendä cinäyät-cäza sisteması uçrejdenielärendä xökem itelgännärne tözätü protsessın oyıştıru ölkäsendä üzara xezmättäşlek turında kileşü tözede.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши