Cämğiät

Bişençe çaqırılış TR Däwlät Sovetınıñ unsigezençe utırışında TR Prezidentı qatnaşa

Deputatlar täqdime belän, kön tärtibendäge mäs'älälär sanı 40 qa citkerelde

 
(Qazan, 31 may, “Tatar-inform”, Gölnar Ğärifullina). Bu minutlarda TR Däwlät Sovetında bişençe çaqırılış TR Däwlät Sovetınıñ unsigezençe utırışı başlandı. Anıñ eşendä Tatarstan Respublikası Prezidentı Röstäm Miñnexanov, TR Däwlät Kiñäşçese Mintimer Şäymiev, TR Premyer-ministrı İldar Xalikov, TR Yuğarı, Konstitutsiä sudları räisläre, Keşe xoquqları buyınça wäqälätle Säriä Saburskaya häm başqalar qatnaşa. Utırışnı TR Däwlät Sovetı Räise Färit Möxämmätşin alıp bara.

İñ elek kön tärtibendä 33 mäs'älä ide. Zakonlılıq häm xoquq tärtibe komitetı räise Şakir Yähüdin kön üzägenä federal' zakonnarnıñ 5 proyektın qarawnı kertergä täqdim itte. Parlamentnıñ mäğärif, mädäniät, fän häm milli mäs'älälär komitetı räise Razil Wäliev, TR Prezidentı täqdime buyınça, TR Ministrlar Kabinetı qarşındağı Baş arxiv idäräsen TRnıñ Arxiv eşe buyınça däwlät komitetına üzgärtü mäs'äläsen kertü täqdime belän çıqtı. Däwlät Sovetınıñ Däwlät qorılışı häm cirle üzidärä komitetı räise Albert Xäbibullin da kön tärtibenä berniçä soraw kertü turında möräcäğät itte. Şul räweşle, kön üzägendäge mäs'älälär sanı 40 qa citkerelde.

Utırışta 13 respublika zakon proyektı, 10 federal' zakon proyektı häm Rossiä töbäkläreneñ zakon çığaru orğannarınıñ zakon initsiativaların qaraw niätlänä. Berençe uqılışta Tatarstannıñ 11 zakon proyektın qaraw planlaştırıla. Alar – “2015 yılda TR büdjetı ütäleşe turında”, “2015 yılda TR Territorial' mäcbüri meditsina iminiäte fondı büdjetı ütäleşe turında”. Şulay uq “Salım salunıñ qısqartılğan sistemasın qullanuçı salım tüläwçelär öçen differentsiälängän salım stavkaları urnaştıru turında”, “TR Däwlät Sovetı deputatı statusı turında”ğı, “TR Däwlät wazifaları turında”ğı, “TR da yäşlär häm däwlät yäşlär säyäsäte turında”ğı, “TR da muzeylar häm muzey eşe turında”ğı h.b. TR zakonnarına üzgäreşlär kertü planlaştırılğan.

Öçençe uqılışta “TR da teatrlar häm teatr eşe turında”ğı TR zakon proyektı buyınça fiker alışu planlaştırıla, ikençe uqılışta – “TR Saylaw kodeksına üzgäreşlär kertü turında”ğı.

“Xökümät säğäte” qısalarında TR Ministrlar Kabinetınıñ “Baliğ bulmağan balalar eşläre buyınça komissiäneñ baliğ bulmağannarnıñ küzätçesezlegen, alar tarafınnan xoquq bozularnı profilaqtikalaw häm alarnıñ xoquqların yaqlaw buyınça eşçänlege turında” mäğlümatı tıñlanaçaq.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши