Iqtisad

Röstäm Miñnexanov Norwegiä biznesın Tatarstanğa çaqırdı

TR Xökümäte yortında Tatarstan Prezidentı belän Norwegiäneñ Rossiädäge Ğädättän tış häm Tulı wäqälätle ilçese oçraşuı uzdı

 (Qazan, 31 may, «Tatar-inform», Arseniy Mawrin). Rossiä belän Norwegiäne küptänge mönäsäbätlär bäyli, Tatarstan alarnı törle ölkädä üsterüne küzdä tota. TR Prezident Röstäm Miñnexanov korol'lek delegatsiäsen sälämläp, şulay dide.

Norwegiä korol'lege yağınnan, Norwegiäneñ Rossiädäge Ğädättän tış häm Tulı wäqälätle ilçese Leydul'w Namtvedttan tış, ilçelekneñ iqtisad mäs'äläläre buyınça kiñäşçese Stefanie Byeru, säwdä buyınça kiñäşçese Frude Mu, mäğärif, fän häm texnologiälär buyınça kiñäşçese Swerre Rustad, energetika häm ekologiä buyınça kiñäşçese Lars Lunden, şulay uq Rossiä-Norwegiä säwdä palatası başqaruçı direktorı Yärle Forbord häm Rossiä-Norwegiä säwdä palatasında Rossiädän wäkil Vladimir Bağreyev qatnaştı.

Tatarstan Xökümäte yortında alarnı TR Prezidentın Röstäm Miñnexanov, TR Premyer-ministrı urınbasarı – TR sänäğät häm säwdä ministrı Albert Kärimov, TR Premyer-ministrı urınbasarı – TR mäğärif häm fän ministrı Engel Fättaxov, TR Premyer-ministrı urınbasarı – TR mäğlümatlaştıru häm elemtä ministrı Roman Şäyxetdinov qarşı aldı.

“İlçe äfände, sez berençe tapqır Tatarstan Respublikasında, biredä Sezgä oşar häm Sez bezneñ daimi qunağıbız bulırsız dip ışanabız”, - dip möräcäğät itte Röstäm Miñnexanov Norwegiä diplomatına.

“Xäzerge säyäsi fon Rossiä belän Yevropa däwlätläre arasındağı mönäsäbätlärgä yoğıntı yasawı añlaşıla. Ämma bu – waqıtlı küreneş, - dide TR Prezidentı. – Rossiä, elekkeçä, dialoğ öçen açıq, Yevropa däwlätläreneñ dä elemtälärne cayğa salu mömkinleklären ezläwen küräbez. Sezneñ Tatarstanğa vizitığız – turı dälil”, - dip östäde ul.

“2015 yılda Norwegiä belän Tatarstan arasında säwdä äyläneşe barı tik 20 mln dollar ğına täşkil itte - bu bik az, - dip assızıqladı Tatarstan liderı. – Respublika – Rossiädä iqtisadi üseş buyınça liderlarnıñ berse. Neft, neft ximiäse, neft eşäkrtü, maşina tözeleşe, energetika. Bez vertolet, oçqıç, qorabl'lär tözibez, innovatsion häm IT-texnologiälärne aktiv üsteräbez, ilneñ fänni üzäge bulıp torabız. Bu barlıq yünäleşlärdä eşlekle elemtälär buldırırğa bula häm kiräk”. Tatarstanğa mäğärif häm fän ölkäsendä dä elemtälärne üsterü dä qızıqlı.

“Ä bezgä azıq-tölek sänäğäte häm balıq eşkärtü texnologiäläre bik qızıqlı. Norwegiäneñ bu ölkädä täcribäse zur. Monnan tış, turistlıq yünäleşen cayğa salırğa kiräk. Tatarstanlılarğa korol'lektä bulırğa qızıqlı bulaçaq, respublikada Norwegiä qunaqlarına kürsäterlek närsälär bar. Bu – Zöyä, Bolğar, Bilär, Alabuğa. Qazannıñ üzenä meñ yıldan artıq”, - dide Prezident R.Miñnexanov.

Norwegiäneñ Rossiädäge Ğädättän tış häm Tulı wäqälätle ilçese Leydul'w Namtvedt, üz çiratında, “ağımdağı säyäsi wazğiät bilgele qatlawlıqlar tudıra”, dip belderde. “Ämma Norwegiä törle yünäleşlär buyınça kiläçäktä xezmättäşlek itü öçen potentsial bar dip sanıy”, - dip städe ul. Wäkillekle delegatsiäne ilçe äfände yuqqa ğına üze citäklämi. Bügen turizm häm mäğärif buyınça oçraşular bulırğa tieş.

Norwegiä delegatsiäse Tatarstanğa Böyek Watan suğışı yıllarında bu tönyaq däwlät territoriäsendä sovet xärbi totqınnarına bağışlanğan ekspozitsiä alıp kilgän. “Bez sovet soldatları istälegen saqlıybız”, - dip assızıqladı ilçe.

Monnan tış, İnnopolis häm Qazan federal' universitetında bulu planlaştırıla.

Miñnexanov yaqın arada Tatarstan delegatsiäse öçen Norwegiägä yaña turlar buyınça eşlärgä säfär oyıştıru turında uylarğa täqdim itte. Korol'lek biznesın Tatarstanğa çaqırdı. “Bezdä ike maxsus iqtisadi zona, sotsial'-iqtisadi mömkinlekläre aldan bilgelängän territoriälär, innovatsion häm federal' däräcädä IT-üzäklär bar. Rossiädä yaxşı bazar – kilegez! Sezneñ biznesnı Tatarstanda üsterü öçen uñay şartlar tudıraçaqbız”, - dip assızıqladı TR Prezidentı.

Fotosurät prav.tatarstan.ru saytınnan alındı.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши