Cämğiät

Engel Näwap ulı Fättaxov, Xalıqara balalarnı yaqlaw köne uñayınnan, möräcäğät itä

Sez bu dönyağa bäxetle bulır öçen tuasız, ä bez, olılar, sezgä härçaq yärdäm qulın suzarğa äzer torabız, dip bilgeläp ütä ministr

 (Qazan, 1 iyün, "Tatar-inform"). TR Premyer-ministrı urınbasarı - TR mäğärif häm fän ministrı Engel Näwap ulı Fättaxov, 1 iyün - Xalıqara balalarnı yaqlaw köne uñayınnan, möräcäğät itä.

"Qäderle yäş duslar! Xörmätle äti-änilär häm xezmättäşlär!

İxlas küñeldän sezne Xalıqara balalarnı yaqlaw köne belän qotlıym!

Sez bu dönyağa bäxetle bulır öçen tuasız. Ä bez, olılar, sezgä iğtibarıbıznı, mäxäbbätebezne büläk itäbez, härçaq yärdäm qulın suzarğa äzer torabız.

Respublikabız danın törle bäygelärdä häm yarışlarda yaqlağan uquçılarıbıznıñ uñışları belän ğorurlanabız. Dürt yıl rättän yegerme dürt fän buyınça ütkärelep kilgän Bötenrossiä mäktäp uquçıları olimpiadaları näticäläre buyınça Tatarstan Respublikası, Mäskäw häm Sankt-Peterburğ komandalarınnan soñ, - öçençe urında. Şuşı könnärdä genä respublikabız yegetläre, qızları WorldSkills Russia “Yäş professionallar” ilküläm çempionatında 64 töbäk arasında öçençe urınğa layıq buldı.

Sezgä belem, küñel cılısı büläk itüçe möğallimnärgä räxmät süzläre citkeräse kilä. Tatarstan mäğärifeneñ köndäşlekkä sälätlelege üsüe - uqıtuçılarıbıznıñ tırışlığı häm näticäle xezmäte.

Tormışı awır xäldä bulğan häm äti-äni nazınnan mäxrüm qalğan balalar belän eşläwgä bağışlağan pedagoglarğa, şulay uq ğailälärendä ullıqqa yäki qızlıqqa alğan häm sälämätlekläre çiklängän balalar tärbiäläwçe äti-änilärgä ayırım räxmät äytäse kilä. Sez älege balalar bäxetle bulsın, mäxäbbät häm iğtibar toyıp yäşäsen öçen barısın da eşlisez, alarnıñ ciñülärenä söyenäsez häm uñışsızlıqları öçen borçılasız.

Bügen – cäyneñ häm kötep alğan kanikullarnıñ berençe könendä respublikabıznıñ barlıq töp mäydannarında festival'lär, teatral' tamaşalar, kontsert programmaları, sport yarışları häm konkurslar uzdırıla. Bu könne balalarıbızğa büläk itkän iğtibar häm küñel cılılığı härçaq alarnı ozata barsın, alarğa aqıllı, täwfıyqlı häm igelekle keşelär bulıp üsärgä yärdäm itsen ide.

Çın küñeldän hämmägezgä dä tınıçlıq, igelek, iminlek, bäxet häm şatlıq telim! Ä uquçılar cäyge yalların faydalı häm küñelle ütkärsen!" - dielä Tatarstan Respublikası Premyer-ministrı urınbasarı – Tatarstan Respublikası mäğärif häm fän ministrı E.N. Fättaxovnıñ täbriknamäsendä.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши