Räsmi xäbärlär

TR Prezidentı Ğarward biznes mäktäben tämamlawçılar belän oçraştı

Tumışı belän törle illärdän häm däwlätlärdän,Rossiädän bulğan uñışlı unöç yäş keşene TR Prezidentı citäkçelegendäge delegatsiä qabul itte

 
(Qazan, 1 iyün, "Tatar-inform", Arseniy Mawrin).Tatarstan Respublikası Prezidentı Röstäm Miñnexanov kiçä TR Xökümäte yortında Ğarward biznes mäktäben tämamlawçılar belän oçraştı.

Tumışı belän törle illärdän häm däwlätlärdän, şul isäptän Rossiädän bulğan uñışlı unöç yäş keşene Tatarstan Respublikası Prezidentı citäkçelegendäge respublika däräcäsendäge idäräçelär delegatsiäse äğzaları – TR Prezidentı Apparatı citäkçese Äsğät Säfärov, Tatarstan Respublikası Prezidentı Tışqı elemtälär departamentı direktorı, respublika ministrlıqları häm vedomstvoları başlıqları, Tatarstan Respublikası İnvestitsion üseş agentlığı citäkçese Taliä Miñnullina qabul itte.

«Bu Rossiägä ikençe säyäxät inde», - dip täğäyenläde Röstäm Miñnexanovka tumışı belän Tatarstannan bulğan Bulat Ğaynullin. Yeget cir yözeneñ iñ mäşhür yuğarı uqu yortın bik äybät tämamlağan häm xäzer Bostonda (AQŞ) üze nigez salğan «EZ Menu» kompaniäseneñ general' direktorı. Biznes ölkäse – restoran biznesı öçen IT-texnologiälär.

«Ğarward biznes mäktäben tämamlawçılar belän berençe oçraşular bıltır Mäskäwdä häm Sankt-Peterburğta uzdı», - dide Bulat Ğaynullin. Bıyıl ul kurstaşların Tatarstan başqalasına kilergä öndägän. Qunaqlar başta İnnopolistağı IT-parkında bulğannar. «Ğarwardçılarnı» innovatsiälärgä yärdäm qolaçı soqlandırğan, alar bu xaqta oçraşu başlanğaç uq xäbär ittelär.

Qunaqlarnıñ, Tatarstan uñışlarınıñ sere närsädä soñ, dip qızıqsınuına Röstäm Miñnexanov bolay dip cawap birde: «Däwamçanlıq. Berençe Prezidentıbız Mintimer Şäymiev yaña Rossiä torğızılğan zamannarda citeşterüne, tağın da möhime – kadrlarnı saqlap qala aldı. Bez ireşelgän uñışlarnı arttırabız. İdäräneñ tögäl sisteması näticä birä. Tatarstan uñışınıñ sere şunda. Bezneñ start pozitsiälärebez dä yaxşı buldı: neft çığaru, neft ximiäse, citeşterülär, alğa kitkän awıl xucalığı. Bez yañalıqtan qurqıp tormıybız, anı üzebezdä üzläşteräbez».

"IT-texnologiälär respublikada menä inde 10 yıldan artıq sistemalı räweştä üsterelä. Tatarstannıñ töp ideologiäse – üzeñne yaxşırtqan kileş, başqalarğa da yaxşırırğa yärdäm it", – dide Tatarstan Respublikası mäğlümatlaştıru häm elemtä ministrı Roman Şäyxetdinov.

IT-park, İnnopolis, Çallıdağı texnopark – bu yünäleş üsä bara. Tatarstannıñ küp tarmaqlarında IT-belgeçlärgä ixtıyac zur, dip östäde ministr.

«Äzer infrastrukturası bulğan territoriälärne täqdim itep, bez kreativ häm ambitsioz keşelärne startaplar buldıruğa etäräbez. Bu ideyä fayda kiterä», - dide Tatarstan Respublikası Prezidentı..

«Böten dönya däräcäsendäge IT-üzäklärdän Silikon dalası belgeçlärne mağnit kebek tartıp tora. Alarnı Tatarstanğa niçek cälep itärgä?» - dip soradı qunaqlarnıñ berse – Nyu-Yorqtağı (AQŞ) Google kompaniäse xäl iteleşlären satu menedjerı Mixail Narinskiy.

«Bez cälep itep kenä qalmıybız, bez tärbiälibez dä, – dide Prezident. – Xäzer mäğärif sistemasına mönäsäbätne üzgärtäbez. Universitet mäktäp däwamı itep kenä sanalmasqa tieş. Bu – kiläçäk basqıç bit. Kiläçägebez belgeçlären bez balalar baqçasınnan uq tärbiäli başlıybız, – dide Röstäm Miñnexanov. – Tatarstan innovatsiälärneñ federal' üzäge bulırğa tieş. Şuña kürä monda İnnopolis häm İnnopolis Universitetı barlıqqa kilde dä inde».

«Ğarward biznes mäktäben tämamlawçılar, täcribä cıyıp, watannarına qaytırğa cıyınalar. Ämma alar qayda kiräk bulaçaqların belmilär. Şuña kürä bez säyäxätlär oyıştırabız da inde. – Bügen kürgännärebez häm qabul itü däräcäse Tatarstanğa qarata qızıqsınu uyata. Bez ikençe yulı zur törkem alıp kilergä telibez. Ğarward biznes mäktäbendä ilenä qaytırğa telägän 200dän artıq rossiäle uqıy», - dip möräcäğät ittelär Röstäm Miñnexanovka.

Bügen qunaqlarnı Röstäm Miñnexanov İnnopolistağı Prezident qampusı qısalarında fiker alışu häm bağlanışlar urnaştıru öçen tağın ber qabat cäy könne Tatarstanğa kilergä çaqırdı.

Fotosurät prav.tatarstan.ru saytınnan alındı.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши