Mädäniyät, Qazan xäbärläre

Färit Möxämmätşin: “Bezgä, äti-änilärgä, balalarıbız, onıqlarıbız – iñ qäderlelär”

“Bez Kremlne yaratabız” festivale qısalarında “Bez törle, ämma bez – bergä!” xorlar konkursı ğala-kontsertında TR parlamentı başlığı da buldı

 (Qazan, 1 iyün, “Tatar-inform”, Läysän İsxakova). Bügen irtädän kiçkä qädär “Qazan Kremle” muzey-tıyulığında Xalıqara balalarnı yaqlaw könenä bağışlanğan “Bez Kremlne yaratabız” festivale uzdırıla. Dürtençe yıl rättän ütkärelä torğan bu çara säğät 11dä “İsänme, bäyräm!” programması belän başlanıp kitte: qlounnar, äkiät häm multfilm geroyları festival' qunaqların Spas manarası töbendä ük qarşı alıp, bäyrämgä çaqırıp tordı.

Şunı bilgeläp uzıyq: bäyräm çaraları Qazan Kremle territoriäseneñ beryulı berniçä mäydanında oyıştırıldı. Äytik, Ğawptwaxta binası yanında “The Road” rok-mäktäbenä yörüçe balalar rok-kontsert quysa, Spas Preobrajenie monastıre territoriäsendä YUXİDİ wäkilläre sabıylar öçen yul iminlege mäktäbe, “Qazan balaları” balalar cämğiäte Balaçaq şähäre oyıştırdı.

“Manej” kürgäzmälär zalınnan yıraq tügel urında balalarnıñ narkotiklarğa qarşı “SaMoStoyätelnıyı deti” berläşmäse aktsiäläre ütkärelä. Qol Şärif mäçete häm İstälek bilgese arasındağı mäydanda sabıylar “Qazan Kremle” muzey-tıyulığı oyıştırğan master-klasslarda qatnaşa. İstälek bilgese qarşında isä Konstantin Xabenskiy teatr-studiäse tamaşaları, Yunkerlar uçilişçesı yanında mawıqtırğıç fän laboratoriäse, Tatar xalqı häm Tatarstan däwlätçelek tarixı muzeye artındağı mäydanda “Yäşel planeta”, Söyembikägä bağışlanğan “Qazan xanbikäse” kürgäzmäläre täqdim itelde. Bäyräm programması qısalarında festival'neñ töp qunaqları – balalar käğäzdä häm asfalta tuyğançı räsem yasadı, ädäbiät bäyrämendä qatnaştı.

Qol Şärif mäçete yänäşäsendäge mäydannıñ tübän yarusında oyıştırılğan “Bez törle, ämma bez – bergä!” xorlar konkursı ğala-kontsertı bäyrämne tağın da yämländerde. Çarada TR Däwlät Sovetı Räise Färit Möxämmätşin, TR Prezidentı yärdämçese Läylä Fazlıyıva, “Qazan Kremle” muzey-tıyulığı Zilä Wälieva qatnaştı. Şunı bilgeläp ütik: törle xalıqlar cırların başqarunı küz uñında totqan konkurs “Tatarstan – yaña ğasır” respublika ictimaği xäräkäte tarafınnan ütkärelä. Anıñ zona turları respublika rayonnarında uzdırılğan. Ğala-kontsertta isä Tatarstannıñ 24 rayonınnan 25 xor kollektivı qatnaştı. Alar arasında balalar, studentlar, veterannar, fol'klor xorları bar ide.
İñ elek Näcip Cihanovnıñ “Respublikam minem” qantatasın barlıq kollektivlar başqaruında yañğıradı. Annarı Färit Möxämmätşin bäyrämgä cıyıluçılarnı sälämläp, Xalıqara balalarnı yaqlaw köne belän täbrikläde.

“Xalıqara balalarnı yaqlaw köne – böten planetada bilgeläp ütelä torğan bäyräm. Bezgä, äti-änilärgä, balalarıbız, onıqlarıbız – iñ qäderlelär.”, – dip bilgeläp ütte ul. TR parlamentı başlığı äytüençä, Tatarstanda törle yäştäge keşelärgä belem birü, yärdäm itü, alarnı üsterügä küp köç quyıla. – Biredä sabıylarnı da, mäktäp uquçıların da, qäderle veterannarıbıznı da kürüemä şatmın. Tatarstan – monnan 15 yıl elek Cir xartiäse – ğarmonik üseş, ekologiäne saqlaw, Tatarstannıñ küptörlelege, küpmädänilege öçen nigez bulğan dokument qabul itkän berdänber töbäk”. Färit Möxämmätşin respublikada Saban tuyı, “Qarawon” h.b. milli bäyrämnärneñ bilgeläp ütelüen iskärtte, bügen Qazanğa törle şähärlärdän, rayonnardan kilgän meñlägän bala, ölkän keşe çığış yasap, başqaru ostalığın ğına tügel, milli üzençäleklären, mädäniäten, här xalıqqa xas milli traditsiälärne kürsätä, dide. Ul TR Prezidentı isemennän bügenge bäyrämne oyıştıruçılarğa räxmät belderde.

Şunnan soñ säxnä türenä bügen, 1 iyün könne, 1 yäşen bilgeläp ütüçe balalar häm alarnıñ äti-äniläre çaqırıldı, sabıylarğa büläkkä uyınçıq ayular tapşırıldı.
Zilä Wälieva süzlärençä, “Bez törle, ämma bez – bergä!” xorlar konkursına yomğaq yasaw – “Bez Kremlne yaratabız” festivaleneñ iñ möhim waqıylarınnan berse.
“Traditsion räweştä, bez festival'ne bügen 1 yäşe tulğan sabıylarnı qotlawdan başlıybız. Berençe yılnı bäyrämgä 1 yäşlek balaları belän nibarı 6 ğailä kilgän bulsa, bügen “Berençe tuğan kön Kremldä” aktsiäsenä quşıluçılar sanınıñ bermä-ber artuı söyenderä”, – dip, “Qazan Kremle” muzey-tıyulığı direktorı sabıylarnı tuğan könnäre belän qotladı, festival'ne ütkärügä yärdäm itkän TR Prezidentına, Qazan meriäsenä, Tatarstan xalıqları assambleyäsına, barlıq ictimaği oyışmalarğa räxmät belderde.

Ğala-kontsertta “Talir täñkä” fol'klor xorı (Tübän Qama), Mendeleyevskinıñ Böyek Watan suğışı häm xezmät veterannarı xorı, Älmätneñ cıyılma xorı h.b. kollektivlar tatar cırları başqardı, rus häm başqa milli cır-biülär xalıqnı üzenä cıydı.

Annarı konkursnıñ ciñüçelären büläkläw tantanası buldı.

Balalar öçen oyıştırılğan bäyräm Qazan kremlendä kiçke 6ğa qädär däwam itterelä. Säğät 3tä Qol Şärif cämiğ mäçete yanında “Tatarstan balaları” küñel açu programması başlana. Biredä kontsert, viktorinalar, konkurslar, fleşmob, kvest kebek çaralar qaralğan. Anı “Tatarstan Respublikası balalar oyışmaları sovetı” töbäk ictimaği oyışması ütkärä.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши