Räsmi xäbärlär, Millättäş

Röstäm Miñnexanov Drezdenda Ğabdulla Tuqaynıñ tuuına 130 yıl tuluğa bağışlanğan ädäbi-muzıkal' kiçädä qatnaştı

Tatarstan Prezidentı Germaniägä öç könlek eş säfäre belän kilde

 (Qazan, 2 iyün, «Tatar-inform»). Tatarstan Respublikası Prezidentı Röstäm Miñnexanov kiçä Drezdenda tatarnıñ böyek şağire Ğabdulla Tuqaynıñ tuuına 130 yıl tuluğa bağışlanğan ädäbi-muzıkal' kiçädä qatnaştı, dip xäbär itä TR Prezidentı matbuğat xezmäte.

Çara «Germaniä-Rossiä mädäniät institutı» ictimaği oyışmasınıñ Kamera zalında uzdı.

Tatarstan Prezidentı Germaniägä öç könlek (2016 yılnıñ 1–3 iyüne) eş säfäre belän kilüen iskärtik.

Bina xollında kitaplardan häm milli kiemle qurçaqlardan torğan kürgäzmä oyıştırılğan. Ädäbi-muzıkal' kiçädä qatnaşuçılar öçen Ğabdulla Tuqay icatı belän tanışırlıq kiñ mädäni programma täqdim itelgän ide.

«Tatarlar Doyçland» mädäniätara integratsion üzäge wäkilläre Tuqay şiğerlären, şul isäptän «Şüräle»ne, «Tuğan tel»ne häm şağirneñ başqa kürenekle äsärlären uqıdılar.

Çarada qatnaşuçılarğa sälämläw süze belän Germaniä-Rossiä mädäniät institutı direktorı Wolfğanğ Şelike möräcäğät itte.

Tatarstan Respublikası Prezidentı Röstäm Miñnexanov, üz çiratında, tatar cämäğätçelege wäkillärenä keçe watannarı belän bağlanışlarnı yuğaltmasqa tırışuları häm aktivlıqları öçen räxmät belderde.

Fotosurätlär prav.tatarstan.ru saytınnan alındı.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши