Mädäniyät, Millättäş

İke köngä isäplängän VII Bötenrossiä awıl Saban tuyına Qazannan irtägä irtük säfär çığalar

Ulianovskinıñ İske Qulatqı rayon üzägendä şul arada öç Saban tuyı bula

 (Qazan, 2 iyün, “Tatar-inform”, Miläwşä Nizametdinova). VII Bötenrossiä awıl Saban tuyı, “Tatar-inform” MA aldan xäbär itkänçä, Ulianovsk ölkäseneñ rayon üzäge bulğan İske Qulatqı awılında ütkäreläçäk. Tatar xalqınıñ älege milli bäyräme 2 köngä isäplängän, yağni 3-4 iyündä bula. İrtägä Bötendönya tatar kongressı binası yanınnan Qazanda torıp eşläwçe jurnalistlar şul tarafqa irtük säğät 6da säfär çığa.

Bötendönya tatar kongressı Başqarma komitetı birgän programma buyınça, 3 iyündä könneñ ikençe yartısında säğät 3tän 7gä qädär mädäni-ekskursion programma qaralğan, 8dän 11gäçä üzäk stadionda kiçke Saban tuyı ütkärelä. Soñğısın Tatarstan Respublikası mädäniät ostaları kontsert programması dip küzallarğa kiräk.

4 iyündä irtänge 9da İske Qulatqı «Gölçäçäk» balalar baqçasında keçkenälär öçen töbäkara balalar Saban tuyı başlana.

Şul uq waqıtta olılar Saban tuyı mäydanı da eşen başlıy. Säğät 9dan kiçke 6ğaça biredä kürgäzmälär, milli aş-su, azıq-tölek yärminkäläre eşli.

VII Bötenrossiä awıl Saban tuyınıñ açılu tantanası säğät 11dä başlana.
Annarı 1 nçe yartıdan kiçke 6ğaça mädäni küñel açu mäydançığında kontsert, milli uyınnar häm sport yarışları uzdırıla, balalar mäydançığı, parasabantuy mäydançığı, ostalar şähärendä kürgäzmä-säwdä eşe oyıştırıla, dekorativ-ğämäli sänğät äyberläre täqdim itelä. Biredä Tatarstan Respublikasınıñ investitsion kürgäzmä, awıl xucalığı texnikası kürgäzmäse mäydançıqları, şulay uq kinomobil, ĞTO normaların tapşıru mäydançığı oyıştırıla.

Milli köräş häm at çabışların säğät 1 nçe yartıda başlarğa niätlänä.

Tatarstan kontsert mäydançıqları da 1 nçe yartıda açıla, kiçke 5kä qädär mädäni programma buyınça bäyrämgä kilüçelärneñ küñelen kütärä.

Kiçke 4tä bäyrämneñ yomğaqlaw öleşen - ciñüçelärne büläkläw tantanasın başlaw planlaştırılğan. Şunda uq 2017 yılda VIII Bötenrossiä awıl Saban tuyı xucası bulaçaq Penza ölkäse Äläzän awılına Saban tuyı estafetasın tapşıru tantanası da qaralğan.

İske Qulatqıdağı Bötenrossiä awıl Saban tuyı kiçke 6da eşen tögälli.

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши