Mädäniyät

“Balqış” festivalendä qatnaşuçılar Qırımğa çığış yasarğa baraçaq —Färit Möxämmätşin

Respublikaküläm konkursnıñ saylap alu turı bügen Qazanda uza

 
(Qazan, 2 iyün, “Tatar-inform”, Liliä Lokmanova). Bügen “Qazan” milli-mädäni üzägendä “Balqış” IV respublikaküläm festivaleneñ zona buyınça saylap alu turı buldı. Anda festival'neñ oyıştıru komitetı citäkçese, TR Däwlät Sovetı Räise Färit Möxämmätşin, Qazan qalası başqarma komitetı citäkçese urınbasarı Damir Fättaxov, Tatarstan töbäk veterannar ictimaği oyışması citäkçese Xäbir İştiräkov h.b. şäräfle qunaqlar qatnaştı.

Qazandağı saylap alu turında Tatarstan başqalasınıñ barlıq rayonnarınnan häm Qazan tiräsendäge munitsipal' rayonnardan qatnaşuçılar icadi köç sınaşa. Bügen 700 läp keşe, barlığı 23 kollektiv çığış yasıy. Bıltır “Balqış”ta 10 meñ çaması veteran qatnaşsa, bıyıl alar tağın da kübräk bulır dip kötelä. Qazandağı saylap alu turınıñ 2 köndä ütkärelüe dä şunı raslıy.

Bu xaqta “Tatar-inform” MA xäbärçesenä Xäbir İştiräkov xäbär itte. Anıñ süzlärençä, festival'dä qatnaşuçınıñ iñ ölkänenenä — 94 yäş.

Festival'neñ saylap alu turı cıyılma xornıñ “Na bereğu welikoy Volgi” cırı belän başlanıp kitte. Annan soñ “Kalinqa” yañğıradı. Älege xorda, 140lap keşe cırlawı mäğlüm. Ğomumän, bügenge çığışlarda xorlarda östenlek birelgän. İkençe ber cıyılma xor jüri xökemenä “Qazan kiçläre” cırın tapşırdı. Älege xorda şaqtıy keşe cıyılğan buluğa da qaramastan, alar törle-törle tatar milli kostümnarınnan çığış yasadı. Veterannar şağirebez Ğabdulla Tuqaynı da onıtmağan: tatar xalqınıñ böyek ulı tuuına 130 yıl tulu uñayınnan, Ğäliä Säyfullina “Telänçe” şiğeren sänğätle itep uqıdı.

Festival'neñ rejisserı Rawşan Şärif süzlärençä, uzğan yıl festival' Böyek Ciñüneñ 70 yıllığına bağışlanğan bulsa, bıyıl tormıştağı, könküreştäge waqiğalarğa östenlek birelgän. “Balqış”nıñ ğala-kontsertında da ölkän artistlarnıñ dönyada barğan waqiğalarğa mönäsäbäte, fikerläre çağılış tabaçaq.

Çaranı räsmi açu tantanasında Färit Möxämmätşin: “Festival'neñ oyıştıru komitetı räise bularaq, min veterannar, ölkän yäştäge üzeşçän artistlar festivalenä min bik zur iğibar biräm. Bez sälätle yaña keşelärne açabız. Sez olı yäştä bulsağız da, awırularığızğa da qaramastan, qayçağında üzegezne naçar xis itsägez dä, säxnädä çığasız. Sez yäşlärgä icatığıznı, ruxığıznı, käyef kütärenkelege biräsez, - dip maqtaw süzläre citkerde häm layıqlı ciñülär teläde. – Bu yäştäge aktivlığığız sezneñ ğömer ozınlığın arttıra tösle. Sez xezmättäşläregez belän aralaşıp, tormışığıznı tağın da matur bizäklärgä bayıtasız”.

Jurnalistlar belän aralaşu waqıtında TR parlamentı başlığı Färit Möxämmätşin festival'gä zur ixtıyac buluın assızıqladı. “Festival'dä veterannar tanışalar, duslaşalar, elekkege dusların tabıp aralaşu mömkinlege birä. Saban tuyına kilgän Qırım xezmättäşlärebez dä älege festival'dän xäbärdar. Qırım xalqı qarşında çığış yasarğa veterannarıbıznı üzlärenä däştelär. Cıyılma kontsert yasap, anda artistlarıbıznı cibäräçäkbez”, - dide ul.

Damir Fättaxov, çığış yasawçılarğa qarağaç, ğorurlıq xisläre tuuın yäşermäde. “Mondıy sostav belän, şundıy köçle cıyılma xor belän sez respublika külämendä genä tügel, il külämendä dä çığış yasap, Rossiäneñ tanılğan artistlarınnan kim bulmağan sanda tamaşaçılar cıya alasız. Sez yäşlärgä bik zur ürnäk”, - dip bäyä birde üzeşçän artistlarğa.

Festival'neñ saylap alu turları rayon häm qalalarda uzdırılğannan soñ, köz köne ğala-kontsert belän tämamlanaçaq.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши