Iqtisad

Röstäm Miñnexanovnı Tatarstannıñ iqtisadi üseş täcribäsen urtaqlaşırğa çaqırdılar

Çaqırunı Federatsiä Sovetı qarşındağı Rossiäneñ iqtisadi üseş buyınça komissiäse utırışında Nikolay Rıjkov citkerde

 (Qazan, 3 iyün, «Tatar-inform», Arseniy Mawrin). Bügen Tatarstan Däwlät Kiñäşçese Mintimer Şäymievneñ RF Federal' Cıyınınıñ Xezmättäşlek buyınça parlamentara komissiäse häm Ärmänstan Respublikası Milli Cıyını äğzaları belän oçraşuında TR Prezidentı Röstäm Miñnexanov adresına Federatsiä Sovetı (FS) qarşındağı Rossiäneñ iqtisadi üseş buyınça komissiäse utırışında qatnaşuğa çaqıru buldı.

Oçraşu Qazan Kremleneñ wäkillekle korpusında uzdı. Anda Ärmänstan Respublikası Milli cıyını räise urınbasarı Ermine Nağdalän, Ärmänstan Respublikasınıñ Rossiä Federatsiäsendäge Ğädättän tış häm Tulı wäqälätle İlçese Oleğ Yısayan, Ärmänstan Respublikası Milli Cıyını fraktsiäläre äğzaları qatnaştı. Rossiädän – FS Federal' qorılış, töbäk säyäsäte, cirle üzaidärä häm Tönyaq eşläre buyınça komitet äğzası Nikolay Rıjkov, Rossiä Federatsiäseneñ Ärmänstandağı Ğädättän tış häm Tulı wäqälätle İlçese İvan Wolınkin, RF FS komitetları äğzaları, Tatarstan Däwlät Sovetı häm Tatarstandağı ärmännär cämğiäte wäkilläre.

“1990 yıllarda minnän yış qına sorıylar ide: Tatarstan – küp millätle respublika, anda dini häm milli cirlektä nizağlar çıqmıy, proizvodstvo saqlanğan, üseş däwam itä. Bu niçek şulay häm monıñ öçen närsä eşlärgä kiräk? Min Şäymievne saqlağız dip cawap birä idem, - dip xätirälär urtaqlaştı Nikolay Rıjkov. - Xäzer Tatarstan üseş aluın däwam itä. Monda respublikanıñ elekkege häm xäzerge citäkçelege, törle däräcädäge xäkimiätlär arasında nizağ bulmaw zur rol' uynadı. Ber-bereñä yärdäm itü, kiñ külämle burıçlar östendä bergäläp eşläw bar”, - dip städe ul.

“Xäzer beryulı berniçä bäysez törkem oyıştırılğan, alarnıñ burıçı – Rossiä iqtisadınıñ torğınlıq xälendä buluın añlaw häm kiläçäk üseş öçen nindi mömkinleklär buluın açıqlaw”, - dip bilgeläp ütte Rıjkov. Şundıy komissiälärneñ berse Federatsiä Sovetı qarşında oyıştırılğan.

“Bez Röstäm Miñnexanovnı komissiä eşendä qatnaşırğa çaqırabız. Ul Tatarstan ürnäge misalında täcribä urtaqlaşır ide”, - dide ul.

Parlamentara komissiä räistäşe respublikanıñ töbäk tarixın saqlawğa mönäsäbäten dä bilgeläp ütte. Bu möhim, dip assızıqladı ul.

Parlamentara komissiä äğzaları Rossiä belän Ärmänstan arasında mönäsäbätlärne üsterü turında bügen kiç fiker alışmaqçı. Anda TR Däwlät Sovetı Räise Färit Möxämmätşin qatnaşaçaq.

Fotosurät prav.tatarstan.ru saytınnan alındı.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши