Cämğiät

Qazanda blogerlar NeForumında qatnaşuçılarnı Tatarstannıñ milli üzençälekläre belän tanıştıraçaqlar

NeForum açılu tantanasında TR Prezidentı Apparatı citäkçese Äsğät Säfärov qatnaştı

 (Qazan, 3 iyün, “Tatar-inform”, Gölnar Ğärifullina). Bügen Tatarstan başqalasınıñ “Qazan Arena” stadionında V blogerlar neForumı açıldı. Qazan älege çarağa 500 dän artıq blogernı cıydı.

Bu forum Rossiä häm BDB illärendä sotsial' media ölkäsendä iñ kiñküläm waqiğa sanala. Yıl sayın bu çara bloğ ölkäsenä SMM-texnologiälär häm sotsial' çeltärlär üseşenä bitaraf bulmağan 300dän artıq keşene cıya. Forumnı Qazanda uzdıru TR Prezidentı tarafınnan xuplanğan. Anda "VKontakte", "LiveJournal", "Odnoklassniki", "Facebook", "Instagram", "Twitter" häm başqa bloğ-platformalarnıñ federal' TOP-100legenä kergän 150 läp populär bloger qatnaşa.

Forum räsmi töstä açılğançı, stadionnıñ futbol qırında qatnaşuçılar öçen törle canlandıru çaraları oyıştırılğan ide.

NeForumnıñ açılu tantanasında TR Prezidentı Apparatı citäkçese Äsğät Säfärov, “Odnoklassniki” sotsçeltäreneñ marketinğ häm biznes üseşe buyınça direktorı Arsen İsrapilov, “VKontakte” sotsçeltäreneñ matbuğat xezmäte başlığı Yevgeniy Krasnikov, LiveJournal Russia baş redaktorı Vasiliy Ğulin, "Tele2" general' direktorı Sergey Emdin häm başqalar qatnaştı.

Çaranıñ açılış öleşendä NeForumnıñ Minskidan elekkege xucaları videorolikta estafetanı Qazanğa tapşırdılar.

Äsğät Säfärov forumda qatnaşuçılarnı TR Prezidentı isemennän sälämläde. “Tatarstan hämmä keşe öçen açıq, bezneñ ğorurlanırlıq, kürsäterlek äyberlärebez baytaq. Sez bu xaqta uquçılarığızğa täfsilläp söylärsez dip uylıym”, - dip möräcäğät itte ul.

Äsğät Säfärov Tatarstannıñ bay mädäniätkä, qüätle innovatsion potentsialğa iä buluın, respublikada unikal' İnnopolis IT-şähäre, tarixi istälekle urınnar küp buluın, sänäğäte kiñ üseş alğanlığın bilgeläp uzdı. “Bolar barısı da tatarstanlılarnıñ kiñqırlı tormışı atmosferasın toyarğa mömkinlek biräçäk. Näq menä traditsiälär saqlanışı Tatarstannıñ totrıqlı üseşe nigeze bulıp tora”, - dide Äsğät Säfärov.

“Sotsial' çeltärlär iñ operativ häm tä'sirle kommunikatsion qanal bulıp tora, anda real' waqıt rejimında millionnarça qullanuçılar üz mäğlümatı belän urtaqlaşa, - dip, Säfärov Tatarstan Prezidentı Röstäm Miñnexanovnıñ da bloger buluın häm Instagram häm “VKontakte” sotsial' çeltärlär aşa aña möräcäğätlär baytaq kilüen assızıqladı. - NeForumnıñ kiläçäge zur dip uylıym. Mondıy çaralar zamança çınbarlıqnı, sotsçeltärlär üseşe tendentsiälären añlaw öçen kiräk".

Sergey Emdin soñğı trendlar arasında “mobayl-onlayn”ğa kerüne atadı häm monı çın mäğnäsendä revolütsiägä tiñläde. Anıñ süzlärenä qarağanda, xäzer keşe kompyüterğa kermiçä dä, barı tik smartfon häm planşetlardan ğına da faydalana ala. “Mobil operator role dä üzgärä, ul keşelärgä aralaşu öçen uñaylı mäydançıq buldırırğa tieş”, - dip belderde Sergey Emdin.

Forumnıñ açılış öleşendä, şulay uq, VKontakte", "LiveJournal", "Odnoklassniki" kebek sotsçeltärlärneñ wäkilläre dä çığış yasadı.

Waqiğa qısalarında 10 tematik sektsiä häm küñel açu çaraları qaralğan. “Sotsmediada kreativ”, “Sotsial' çeltärlär niçek üläçäk”, “Uyın striminğı häm turı translätsiälär”, “Mobil digital da trend häm qarşılıqlar”, “Sotsial' çeltärlärdä niçek aqça eşläp bula”, “Blogingnıñ yaña formatları: foto häm video”, “Uyın videobloginğı”, Travel-bloginğ”, “Lifestyle: beauty, sport häm sälämät tormış räweşe”, “Töbäk bloğoölkäläre: täcribä urtaqlaşu” dip isemlängän sektsiälär bar.

Forumnı oyıştıruçılar matbuğat konferentsiäsendä bilgeläp uzğança, Qazandağı forum 5 yıllıq tarixta iñ külämlese. Anıñ ni öçen neForum dip ataluına kilgändä, alar monı räsmilektän qaçuğa, ğadi aralaşuğa qorılğanlığına işarä buluın añlattı.

Oyıştıruçılarnıñ berse – Yevropa kommunikatsiälär üzäge direktorı urınbasarı, blogerlar proyektı citäkçese Yevgeniä Başkirova “Tatar-inform” mäğlümat agentlığı xäbärçesenä beldergänçä, neForum qısalarında Tatarstannıñ milli rizıqları belän sıylaw qaralğan. Bu – oyıştıruçılarnıñ üz initsiativası. “Bez törle töbäklärdän, çit illärdän kilgän wäkillärgä milli aş-sunı, milli üzençäleklärne kürsätergä telädek. Bezgä Awropa menüsın täqdim itä başlağaç, kire qaqtıq, barı tik milli menünı ğına qaradıq. Blogerlarnı Zöyägä, şulay uq Saban tuyına da alıp barırğa niätlibez, Qazannıñ tarixi öleşe buyınça ekskursiägä barırğa teläwçelär dä küp. Alarnıñ töbäkneñ milli tösmerlären toyuı möhim”, - dip assızıqladı Yevgeniä Başkirova.

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши