Mädäniyät

Dmitriy Medvedev “Tatarstan kitap näşriäte” eşçänlegen yuğarı bäyäläde

Mäskäwdä açılğan “Qızıl mäydan” kitap festivalendä 400 näşriät arasında Tatarstan wäkilläre dä bar

 (Qazan, 3 iyün, "Tatar-inform", Rämis Latıypov). RF Premyer-ministrı Dmitriy Medvedev bügen Mäskäwdä açılğan “Qızıl mäydan” kitap festivalendä “Tatarstan kitap näşriäte” kürgäzmäsendä bulıp, näşriät eşçänlegenä yuğarı bäyä birde. Bu xaqta älege näşriät general' direktorı İldar Säğdätşin xäbär itte.

“Qızıl mäydan” festival'-yärminkäse Puşkin tuğan köngä häm Rus tele könenä bağışlap ütkärelä. Berençe tapqır çara 2015 nçe yılda uzdırılğan ide. Bıltır näşriätlär kürgäzmälären Vladimir Putin qarap bäyäläde. Bıyılğı çarada isä Dmitriy Medvedev qatnaşqan. RF Premyer-ministrı Tatarstan kürgäzmäse yanında ayıruça ozaq tuqtalıp, näşriättä eşläwçelär belän äñgämä qorğan.

“Min anı näşriät eşçänlege belän tanıştırdım, bıltır 200gä yaqın kitap çığuın äyttem. Ul ğomumi tiraj belän qızıqsındı. Bıltır yartı millionğa yaqın digäç, ğäcäplänüen belderde. Eşebezne yuğarı bäyäläde, “molodtsı!” dip äytte”, - dide İldar Säğdätşin.

Musa Cälilneñ tuuına 110 yıl bulu uñayınnan, näşriät kürgäzmädä bıyıl qabat basılıp çıqqan “Moabit däftärläre”n häm geroy şağir turında törle yıllarda çıqqan başqa kitaplarnı da täqdim itkän. Çarada şağirneñ qızı Çulpan Cälilova da qatnaşqan.

“Min Dmitriy Medvedevqa Musa Cälil turındağı kitaplarnı kürsättem, “Moabit däftärläre” kitabın büläk ittem. Çulpan Museyevna belän tanıştırdım. Medvedev, ätiegezne xäterlisezme, dip, anıñ belän dä söyläşep aldı. Bezneñ belän ber kürgäzmädä bulğan Milli kitapxanä direktorı Söyembikä Cihanşina näşriättä çıqqan milli kitapxanä turındağı albom büläk itte”, - dide İldar Säğdätşin.

Bıyılğı festival'dä ilneñ 80 töbägennän 400 näşriät qatnaşa. Çaqırılğan qunaqlar arasında Yevgeniy Yevtuşenko, Edward Radzinskiy, Mixail Weller, Tatiana Ustinova kebek yazuçılar belän bergä, “Zöläyxa küzlären aça” romanı belän tanılğan Güzäl Yäxina da bar.

“Tatar kitap näşriäte” bıltır yärminkägä alıp kilgän kitaplarınıñ 70 protsentın satıp betergän. Bıyıl näşriät ğomumi awırlığı 1 tonna bulğan 300 isemdäge kitaplar alıp kilgän. Alarnıñ 85 protsentı - tatar telendä.

“Çaranıñ reklaması da köçle buldı, bıyıl yärminkägä kilüçelär bik küp. Şuña kürä ömetlär zurdan, küp kitap satarğa ömetlänäbez. Mäskäwdä yäşäwçe tatarlar yaña kitaplar belän tanışu öçen maxsus kilälär. Bu tatarlar öçen üze ber bäyräm”, - dide İldar Säğdätşin.

“Qızıl Mäydan” kitap festivale 6 nçı iyüngä qädär däwam itäçäk.

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши