Millättäş

Tatar blogerları, sez qayda? – Rimzil Wäliev

Blogerlar NeForumında qatnaşuçı Niäz Latıypov, MMÇ belän çağıştırğanda, blogerlarnıñ auditoriäse zurraq buluın assızıqladı

 (Qazan, 3 iyün, “Tatar-inform”, Gölnar Ğärifullina). Bügenge köndä bloğlarnıñ, basma matbuğatqa qarağanda, näticälelege zurraq. Tatarstan blogerı Niäz Latıypov şulay dip sanıy. Bügen ul Qazanda açılğan blogerlar NeForumında qatnaşa.

Niäz Latıypov “Tatar-inform” mäğlümat agentlığı xäbärçesenä beldergänçä, bloğ belän ul 2003 nçe yıldan birle şöğellänä. Biektaw rayonı Mamonino awılında kolxoz satıp alıp sarıq ürçetä başlap, Niäz Latıypov awıl xucalığı turında yazuğa kereşä. “Başta ul xobbi, köndälek kebek kenä ide, soñraq bu qızıqsınu arttı. Mine keşelär küpläp uqıy başladı. Baqsañ, awıl xucalığı turında yazu berençe qaraşqa toyılğança uq küñelsez tügel ikän. Min keşelärgä monıñ qızıqlı buluına töşendem. Minem bloğım da http://mamonino.livejournal.com/ dip atala. Min bu eşçänlegemne xobbi dip sanıym, ämma anı iğänäläw öçen aqça eşli torğan başqa biznesım da bar. Xäyer, qayberläwlär bloğnı näq menä aqça eşläw çığanağı bularaq faydalana”, - dip belderde Niäz Latıypov.

Bloger fikerençä, tatar telendä bloğlardağı mäğlümat belän qızıqsınuçı auditoriä sanı az bulğanlıqtan, tatar telendä mondıy çara ütkärüneñ mägnäse bulmas ide, härxäldä yaqın arada. “Bezneñ auditoriäbez bar, bezne uqıylar. Basma jurnalistikanıñ, minem qaraşqa, ğömere küp qalmadı. İkençe yaqtan qarağanda, bez jurnalistlar tügel, bezneñ nindider professional' künekmälärebez yuq, ämma bezneñ auditoriägä qızıqlı qontentıbız, härqaysıbıznıñ şul tema buyınça maxsuslaşqan auditoriäbez bar. Mine könenä 10-20 meñ keşe uquın isäpkä alğanda, monı berär massaküläm mäğlümat çarası uquçıları sanına da tiñläp bulır ide. Qayberäwlärne yözlärçä meñ, millionnarça keşe uqıy. Şuña kürä bloğlar mäğlümat citkerü yağınnan küpkä näticäleräk”, - dip sanıy Niäz Latıypov.

Qazanda populär sanalğan blogerlarnıñ tağın berse – Niäz Aqsanov. Ul isä, distälägän illärne gizep çığıp, şul säyäxätlär turında fiker urtaqlaşa - http://kukmor.livejournal.com/

Tanılğan jurnalist, cämäğät eşleklese Rimzil Wäliev Tatarstannıñ üzeneñ blogerları az buluına borçuın belderde. Bügen ul forumğa Tatarstannıñ ber wäkile bularaq barğan. Ul “Tatar-inform” MA xäbärçesenä rus telendä yazuçı blogerlarnıñ 3-4 meñ, xätta 100 är meñ qullanuçısı buluına häm bezneñ bu mäs'älädä qalışuıbızğa basım yasadı. “Bügen bu forumda vestibül'dä teläklär yazu taqtasında “Tatar blogerları, sez qayda?” digän yazu da qaldırdım. Min üzemne klassik bloger dip sanamıym, min jurnalist-bloger, çönki analitik oçerqlar icat itäm. Äle xäzer videobloger bulıp kitü niätem dä bar”, - dip söyläde Rimzil Wäliev.

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши