Din

TR möftie “Uraza” kitabı turında: “Bu kitap – härkem öçen faydalı ber çığanaq bulır dip uylıym”

Xalıqnıñ sorawı buyınça, “Uraza” kitabı bıyıl yañadan bastırılğan

 
(Qazan, 3 iyün, “Tatar-inform”). “Xozur” näşriät yortı Tatarstan möftie Kamil xäzrät Sämiğullinnıñ “Uraza” dip atalğan kitabın näşer itte. TR möselmannarı Diniä näzaräte räise anıñ eçtälegen, ähämiäten “Tatar-inform” mäğlümat agentlığına söyläde.

“İslamda här möselman öçen farız, tieşle biş ğämäl bar: şähadät, uraza, namaz, zäqät häm xac. Bolar xaqında yış söylilär, kitaplar da küp kebek. Möselmannarnıñ ramazan ayında uraza totuı xaqında da beläbez. Ämma, şuña da qaramastan, ramazan yaqınlaşa başlawğa, uraza turında sorawlar birä başlıylar. «Närsä soñ ul uraza? Niçek urazağa kerergä? Kemgä kiräk ul? Urazanı närsälär boza?” häm başqa şundıy sorawlarğa cawapnı İnternettan da küp ezlilär. Törle keşe törleçä cawap birä, butalıp ta kitälär. «Uraza» kitabı älege sorawlarğa cawap räweşendä tözelgän. Anda urazanıñ üzençälekläre dä, tärtipläre dä yazılğan. Bu kitap - üzenä kürä ber beleşmälek. Şuña kürä ul härkem öçen faydalı ber çığanaq bulır dip uylıym. Härkemgä Rabbıbız quşqan farız ğämäl – urazanı tieşençä totarğa yärdäm itär. Üzen möselman sanağan här keşe uraza totarğa tieşle”, - dip assızıqladı Kamil xäzrät Sämiğullin.

Möfti süzlärenä qarağanda, älege kitap 2014 yılda inde 3 meñ danälek tiraj belän bastırılğan bulğan. Xalıqnıñ küpsanlı sorawı buyınça, bıyıl yañadan dönya kürgän. Kitap yazuğa berniçä ay waqıt kitkän, häm basmanı äzerläwdä küpsanlı fänni xezmätlär qullanılğan.

Kitapnıñ üzençälegenä kilgändä, Kamil xäzrät bilgeläp uzğança, bu kitapta, uraza totudan tış, iğtiqäf fazıylätläre xaqında añlatılğan. Bu ramazan ayınıñ soñğı un könendä qılına torğan ber ğibadät. Yağni, ir keşe, mäçettän çıqmıyça, berniqädär waqıt barı tik ğibadät qılıp qına yäşi. Xatın-qızlar monı öydä başqara ala. Säxabälärneñ berse dä iğtiqäf qılmıy qalmağan. İğtiqäf qılğanda, keşe dönya eşlären onıtıp tora. Qor'än uqıy, doğalar qıla, namaz uqıy, uraza tota. Böten uyların, küñelen Allahı Täğälägä ğibadät qıluğa ğına bağışlıy. Ul köndez dä, tönlä dä mäçettän çıqmıy. Kitapta iğtiqäf qılunıñ barlıq tärtipläre yazılğan. Soñğı yıllarda respublikabız mäçetlärendä dä bu ğämäl başqarıla.

“Şunı äytergä bula: bu kitap millättäşlärebez öçen tatarça näşer itelde. Bezneñ äbilärebez, babaylarıbız suğış yıllarında da urazaların qaldırmağan bit. Xäzer dä uraza totuçılar sanı yıldan-yıl arta bara”, - dip bilgeläp ütte TR möftie.
Kamil xäzrät äytüençä, respublikabızda ramazan däwamında iftarlar uzdırıla. Mäçetlär qarşında maxsus çatırlar quyıla. Qayber mäçetlär 500-600är keşe sıya torğannı da quyalar. “Bik küp din qärdäşlärebez öydä tuğannarı, yaqınnarı belän iftar qıla. Ä 22 iyündä äle respublikaküläm iftar uzdıraçaqbız. 10 meñ keşelek xäyriä aşı bulaçaq ul. Eşquarlar bezgä anı uzdırırğa, oyıştırırğa yärdäm itä, volonterlar da cıyabız”, - dide möfti.

"Uraza" kitabın «Xozur» näşriät yortı kibetlärennän alırğa mömkin.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши