Räsmi xäbärlär, Millättäş

Röstäm Miñnexanov VII Bötenrossiä awıl Saban tuyında qatnaşa

İl külämendäge tatar bäyräme bu minutlarda Ulianovsk ölkäse iske Qulatqı cirlegendä bara

 (Ulianovsk ölkäse, "Tatar-inform", Liliä Lokmanova). Bu minutlarda Ulianovsk ölkäseneñ İske Qulatqı eşçelär bistäsendä VII Bötenrossiä awıl Saban tuyı bara. Anda TR Prezidentı Röstäm Miñnexanov, ölkä gubernatorı wazıyfaların waqıtlıça başqaruçı Sergey Morozov, RF Däwlät Duması deputatı Vladislav Tretiaq, RF Prezidentınıñ İdel buyı federal' okruğında wäqälätle wäkil yärdämçese Aleksey Simonov, İske Qulatqı rayonı başlığı Eduard Ğäniev, Rossiäneñ törle töbäklärennän kilgän 500dän artıq delegat häm bik küp qunaqlar qatnaşa. Tatarstan delegatsiäse sostavında TR möftie Kamil xäzrät Sämiğullin da bar.

Milli bäyräm delegatlarnıñ mäydannı äylänüe belän başlandı. Alardan soñ mäydanda Aydar Fäyzraxmanov citäkçelegendäge fol'klor muzıkası däwlät ansamble häm "Qazan" biü ansamble başqaruında "Saban tuyınıñ tarixı häm kiläçäge" dip isemlängän teatral'läşterelgän muzıkal' xoreografik küreneş täqdim itelde.

Sergey Morozov süzen TR Prezidentı Röstäm Miñnexanovka häm Tatarstan xalqına räxmät äytüdän başladı. "Bez yazğı çäçülärne tämamladıq häm bıyıl ğädättägegä qarağanda da kübräk aşlıq çäçtek, yaxşı uñışqa ömetlänäbez. Yaxşı uñış kürsätkän ber genä xezmätçän dä iğtibarsız qalmasın öçen, ilebez bezneñ belän ğorurlansın öçen bez barısın da eşläyäçäkbez", - dip wäğdäläde ul.

Röstäm Miñnexanov: "Bez Ulianovsk ölkäsendä mondıy çaranı öçençe tapqır uzdırabız. Bez monda yäşäwçe barlıq millätlärneñ häm konfessiälärneñ dus häm tatu yäşäwen küräbez. Saban tuyın bügen bik üzençälekle - balalar baqçasında başladıq. Nindi genä millättän bulsaq ta, ğöref-ğädätlärebezne saqlarğa kiräk. Saban tuyı - tatar xalqıbıznı brendı", - dide häm oyıştıruçılarğa räxmät belderde.

Saban tuyında, ğädät buyınça uzdırıla torğan sport yarışlarında ciñüçelärgä bıyıl da büläklär muldan äzerlängän. Milli bäyrämdä at-sport yarışında zur urın birelgän. Moña qädär andıy yarışlarnıñ äle oyıştırılğanı bulmağan. Sergey Morozov initsiativası belän uzdırılğan at çabışında barı İske Qulatqı rayonında yäşäwçelär genä qatnaşa ala. Anda ciñüçegä gubernator "UAZ" avtomobilen büläkkä äzerlägän. Saban tuyındağı at çabışında qatnaşqan Ulianovsk ölkäse, Samara, Toliatti şähärläre, Başqortstan wäkillärenä dä büläklär bar. Köräştä batır qaluçığa isä TR Prezidentı Röstäm Miñnexanov ciñel maşina büläk itäçäk. Saban tuyı küreneşlären Tatarstan liderı instagramdağı bitenä urnaştıra bara.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши