Räsmi xäbärlär

Ekoloğlar köne uñayınnan, TR Prezidentı Röstäm Miñnexanov möräcäğät itä

Su saqlaw zonaları yılı bezgä su resurslarınıñ totrıqlı üseşenä häm alarnıñ ekologik qurqınıçsızlığına ireşügä mömkinlek biräçäk, dip bilgeläp ütä res

 (Qazan, 5 iyün, “Tatar-inform”). Tatarstan Respublikası Prezidentı Röstäm Nurğäli ulı Miñnexanov, Ekoloğlar köne uñayınnan, möräcäğät itä.

“Xörmätle tatarstanlılar!

Tatarstan – Rossiä Federatsiäseneñ yuğarı üseşkä ireşkän sänäğät töbäklärennän berse. Tabiğättän näticäle faydalanu mäs'äläläre respublikanıñ Sotsial'-iqtisadi üseş strategiäsendä östenlekle urın alıp tora. Äylänä-tirä moxitkä texnogen yoğıntını kimetü, grajdannarnıñ yuğarı tormış däräcäsen tä'min itü yünäleşendä sistemalı häm ozaq waqıtqa isäplängän eşçänlek – bez ğämälgä aşıra torğan däwlät programmalarınıñ töp maqsatı.

Tatarstanda ekologiä härçaq iğtibar üzägendä. 2013 yılda bez Ekologik kul'tura häm äylänä-tirä moxitne saqlaw yılın bilgeläp üttek. Parklar häm skverlar yılında cämğiät öçen uñay tirälek buldıru buyınça zur eş başqarıldı. 2016 yıl respublikada Su saqlaw zonaları yılı dip iğlan itelde, bu isä bezgä su resurslarınıñ totrıqlı üseşenä häm alarnıñ ekologik qurqınıçsızlığına ireşergä mömkinlek biräçäk.

Hiçşiksez, Ekoloğlar könen tabiğätne saqlaw ölkäsendä eşläwçe belgeçlär genä tügel, bälki ğalimnär, Tatarstannıñ küp sanlı cämäğät oyışmaları, wolontörlar, respublikadağı barlıq keşelär üz bäyräme dip sanıy.

Tabiğät baylıqların saqlap qaluğa häm şul xäzinäne tağın da arttıruğa zur öleş kertüegez, balalarıbız häm onıqlarıbıznıñ sälämätlegen qayğırtıp, alarnıñ kiläçägenä ixtiramlı qarawığız öçen Sezgä räxmät süzläremne citkeräm.

Çın küñeldän barığızğa da igelekle xezmätegezdä uñışlar, bäxet, tınıçlıq, iminlek telim!

Tatarstan Respublikası Prezidentı R.N. Miñnexanov”.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши