Din

Ramazan ayı başlanu uñayınnan, Tatarstan möftie Kamil xäzrät Sämiğullin möräcäğät itä

Ramazan ayı 5 iyündä, qoyaş bayığannan soñ, başlana

 (Qazan, 5 iyün, “Tatar-inform”). Ramazan ayı başlanu uñayınnan, TR möselmannarı Diniä näzaräte räise, möfti Kamil xäzrät Sämiğullin möräcäğät itä.

“Bismilläähir-raxmäänir-raxiiim.

Ässäläämü ğäläyküm üä raxmätüllahi üä bärakäätüh!

Möxtäräm din qärdäşlärebez! Tatarstan Respublikası möselmannarı Diniä näzaräte häm şäxsän üz isememnän izge ramazan ayı başlanu belän ixlastan qotlıym!
2016 yılda ramazan ayı, Allah boyırsa, 5 iyündä qoyaş bayığannan soñ başlana. Bu kiçtä Tatarstan mäçetlärendä 20 räkäğätle berençe tärawix namazları uqılaçaq. 6 iyündä isä tañ atu belän möselman qärdäşlärebez Allahı Täğäläbez farız itkännärne ütäp häm Söyekle Päyğämbärebez Möxämmäd sallallahu ğäläyhi wä sälläm ürnägendä urazağa kerälär.

İslamda här möselman öçen farız, yağni ütärgä tieşle bulğan biş ğämäl bar: şähadät, uraza, namaz, zäqät häm xac. İzge ramazan ayı barça möselmannarğa şul tieşle ğämällärneñ bersen ütärgä – uraza totarğa mömkinlek birä. Bez urazanı Rabbıbız rizalığı öçen dip totabız. Allahı Täğälä Qor'äni Kärimneñ «Äl-Bäkara» süräse, 183 nçe ayätendä: «Äy, iman kitergän bändälär, sezdän elekke qäwemnärgä farız bulğan şikelle, sezgä dä uraza farız buldı», – dip, urazanıñ farızlığın belderde.

Allahı Täğälä ramazan ayında bezgä turı yul kürsätüçe Qor'äni-Kärimne iñdergän. Bu aydağı Qäder kiçäseneñ qimmäte meñ aydan da zurraq. Näq menä şul kiçädä İzge Qor'änneñ berençe äyätläre iñderelgän. Qäder kiçäsendä qılğan izge ğämällärebezneñ äcer-sawapları zurdan, qılğan doğalarıbız qabullardan bula. Ramazanda färeştälär uraza totuçılarnıñ gönahların kiçerüne sorap toruların da onıtmasqa kiräk.

Rabbıbız uraza totarğa häm gönahlı eşlärdän tıyılırğa, küñellärebezgä miherban birep, izge ğämällär qılırğa yärdäm itsen ide. Olı canlılıq kürsätergä, moxtaclarğa, yätimnärgä, invalidlarğa, yalğız qartlarğa yärdäm qulı suzarğa nasıyp bulsın. Ramazan ayında eşlägän izgelekkä sawap 10nan alıp 700gä qädär märtäbä artığraq. Päyğämbärebezdän kilep ireşkän ködsi xädistä Allahı Täğälä äytä: «Uraza ğibadäte – Minem rizalığım öçen. Anıñ äceren Üzem birermen».
Älege izge aynı barıbızğa ğibadättä uzdırırğa yazsın, tönnärne Allahqa ziker qılıp, Qor'än uqıp häm yaqınnarıbıznı söyenderep ütkärik. Allahı Söbxanähü wä Täğälä barıbızğa da köç häm sabırlıq birsen! Totqan urazalarıbıznı, qılğan izge ğämäl-ğibadätlärebezne, doğalarıbıznı, uqığan tärawix namazlarıbıznı qabullardan qılsa ide. Amin!

İxtiram häm izge doğalar belän,
Üzäkläşkän dini oyışma – Tatarstan Respublikası möselmannarı Diniä näzaräte räise, möfti Kamil xäzrät Sämiğullin”.

Fotosurät dumrt.ru saytınnan alındı.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши