Cämğiät

İzge ramazan ayı citte

Üzen möselman sanağan häm mömkinlege bulğannar urazağa kerä

 (Qazan, 5 iyün, “Tatar-inform”). Bügen, yağni 5 iyündä qoyaş bayığaç, hicri buyınça ramazan ayı başlana. Tatarstan mäçetlärendäge imamnar bu izge ayda tärawix namazın 20 räqäğät uqırğa tieş digän qararğa kilengän.

Möselmannar urazanı 6 iyünnän tota başlıy.

TR möselmannarı Diniä näzaräteneñ Ğölämälär şurası häm qazıylar utırışı bulıp, älege mäs'älälärdä açıqlıq kertelgän ide.

Fitır sädaqası külämen arpa häm yözem bäyäsennän çığıp bilgelärgä kileşende.

Fitır sädaqası ber keşegä, arpa bäyäsenä qarap, - 100 sum, yözem bäyäsenä qarap, - 600 sum.

Fidiä sädaqası - 200 sum.

Zäqät nisabı - 224 meñ sum, fitır sädaqası nisabı - 21,6 meñ sum.

Fidiä
Ramazan ayında uraza tota almağan keşelär urazaların başqa aylarda tota ala, urazanı bötenläy tota almağannar isä fidiä sädaqası tülärgä tieş bula. Fidiä – uraza totmağan könnär öçen birelä torğan sädaqa. Fidiä aqçalata tülänergä mömkin.

Fitır
Ramazan ayında fitır sädaqası häm zäqät bilgelänä. Fitır sädaqası birü här möselmanğa da wäceb ğämällärdän sanala. Fitır sädaqası moxtaclarğa birelä. Fitır sädaqasın, möselman bulmağannardan häm fäqirlärdän tış, bar keşe dä birergä tieş. Fitırnı ğailä başlığı barlıq ğailä äğzaları häm anıñ tärbiäsendä bulğan keşelär öçen üzeneñ keremennän tüli. İr bala baliğ buluğa, fitırnı üze öçen üz keremennän tülärgä omtılırğa tieş. Andıy mömkinlege bulmağan oçraqta, bu burıç ğailädäge başqa ir-atlar östenä töşä.

Urazanıñ soñğı köne 4 iyülgä turı kilä, 5 iyüldä – Uraza ğäyeteneñ berençe köne (Ğäyet 3 kön bilgeläp ütelä).

Qazanda respublika iftarı "Kazan-Arena" stadionı ğazonında 22 iyün könne bula, 10 meñläp keşene cıyılır dip farazlana. Älege kiñ külämle iftar aşın ütkärüdä volonterlar yärdäme kiräk. Bu sawaplı eştä qatnaşırğa teläwçelär biredä terkälü uza ala. Östämä mäğlümatnı 89274533000 telefonı buyınça şaltıratıp yäki TR möselmannarı Diniä näzarätenä möräcäğät itep beleşergä bula.

İskärtep ütik: bıltır Ramazan 18 iyündä kergän ide. Uraza waqıtında keşeneñ küñele neçkärä, şäfqätlelek, märxämätlelek xisläre tua. Ramazan keşelärne berläşterügä, ruxi pakländerügä, tüzemlelek tärbiäläwgä sälätle. Urazanıñ qimmäte – möselmannarnıñ köndezen aşaw-eçüdän, yaqınlıq qıludan tıyılıp toruında ğına tügel, bozıq uy-ğämällärdän häm süzlärdän tıyıluında.

Niät häm iftar doğaları.

Säxär aşap betergäç, uraza totuğa niät qılına. Tatarça: “İlähi niät qıldım, Rabbım, Üzeñneñ rizalığıñ öçen Ramazan urazasın totmaqqa, tañ belengännän alıp qoyaş bayığanğa qädär”. Ğäräpçä niät qılu möstäxäb bulır: “Näwäytü än äsuumä sawmä şähri ramädaanä minäl-fäcri iläl-mäğribi xaalisan lilläähi täğaalää”.

Awız açqannan soñ: “Ällahümmä läkä sumtü üä bikä ämäntü üä gäläykä täwäkkältü üä gälää rizqıyqäftartü fägfirlii yää ğaffarü mä qaddämtü üä mä äxxärtü”. Tatarça: "Yä, Rabbım, üzeñneñ rizalığıñ öçen genä uraza tottım, totqan urazalarımnı qabul qıl, yä, Rabbım, üzeñneñ birgän niğmätläreñ belän awız açam, qılğan gönahlarımnı ğafu it", dip doğa qılu kiräk.

Fotosurät dumrt.ru saytınnan alındı.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши