Millättäş

Latwiä başqalası Riğa şähärendä Saban tuyı ütte

 (Qazan, 5 iyün, “Tatar-inform”. Alsu İsmäğileva). Riğadağı Saban tuyına Latwiäneñ üzennän, Estoniä häm Litwadan 200läp keşe cıyılğan ide.

Saban tuyı mäydanın Latwiäneñ milli-mädäni cämğiätlär assotsiatsiäse binası yänäşäsendäge parkta oyıştırğannar. “Bäyräm milli ruxta ütte, cıyılğan xalıq bik teläp uyınnarda qatnaştı, aralaştı. Bäyrämgä 200läp keşe cıyıldı, şularnıñ dürttän ber öleşe Estoniädän häm Litwadan kilgän qunaqlar ide. Qazannan da qäderle 2 qunağıbız bar ide – Tatarstannıñ xalıq artistqası Rimma İbrahimova häm yaqtaşıbız, Xalıqara konkurslar laureatı Liliana Ğäzizova”, - dip xäbär itte “Tatar-inform”ğa Latwiä tatarlarınıñ “İdel” cämğiäte räise Rinat Axun. Şunısın da iskärtü kiräk: tatar xalqınıñ milli bäyrämendä cirle latış xalqı da teläp qatnaşqan.

Riğada bıyılğı Saban tuyı Tatarstan häm Latwiä respublikalarınıñ Mädäniät ministrlıqları, Latwiä tatarlarınıñ “İdel” cämğiäte, Başqort qorıltayı köçe belän oyıştırılğan.

Latwiägä tatarlar Böyek Watan suğışınnan soñ kilep tuplana başlıy. Alarnı biregä Rossiäneñ üzäk töbäklärennän çaqırtalar häm alarğa Baltıyq buyınnan Sebergä sörelgän krestiannarnıñ cir bilämälären birälär. Tatar keşeläre şulay uq Latwiäneñ törle sänäğät predpriätielärenä eşkä kilgän belgeçlär arasında da küp bula. Tatarlar biredä üz cämğiätlären tözilär, räsmi räweştä ul 1988 yılda terkälä. Xäzerge waqıtta Latwiädä 3 meñläp tatar keşese yäşi.

Fotolarda — Saban tuyı mäydanına çaqıru bannerı; Tatarstannıñ xalıq artistqası Rimma İbrahimova häm Latwiä tatarlarınıñ xalıq ansamble qızları.

(Rinat Axun fotoları).

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши