Mädäniyät

AQŞta yäşäwçe millättäşebez İlhan Sadrinıñ mädäni bloğına Röstäm Yäxin romansları östälde

İlhan tatar dönyasında barğan barlıq xällärdän xäbärdar

 
(Qazan, 5 iyün, "Tatar-inform", Alsu İsmäğileva). San-Frantsisqoda yäşäwçe muzıkant İlhan Sadri tatar mädäni mirasın tuplaw belän mäşğül. Şuşı könnärdä ul "The Peremech Lounge" dip atalğan internet säxifäsenä kompozitor Röstäm Yäxin äsärlären urnaştırğan.

İlhan Sadri çığışı belän Penza tatarlarınnan. Anıñ äbise Zöhrä Quğuşeva 1910 yılda Penza gubernasında tuğan. 1917 yıllar tiräsendä Zöhräneñ babası Xäsän Quğuşev, tuğannarın cıyıp, Qıtaynıñ Mançjuriä ölkäsendäge Xaylar şähärenä küçenep kitä. Zöhrä Quğuşeva şunda tatar mäktäbe citäkçese bulıp eşli, annarı Törkiädä kitä, 2000 yılda wafat bula. İlhan Sadri Zöhrä Quğuşevanıñ qızı Taliäneñ ulı, 1966 yılda Kanadada tuğan.

Milläte, tamırları belän qızıqsınu säbäple, tatar mirasın internet säxifägä tuplıy başlağan. "The Peremech Lounge" dip atalğan bloğın ul 2006 yılda açqan. Älege bloğta tatar retro cırları saqlana, alarnı teläsä qaysı internet qullanuçı tıñlıy ala.

Bu tuplanmanıñ çığanağı – Şämsiä häm Salix Apaqaylardan qalğan şäxsi miras. Apaqaylar - Amerika tatarları belän elemtälär buldırıluğa küp köç quyğan, sovet çorında uq AQŞtan Qazanğa kilügä ireşkän keşelär. Qazanda alar tatar cırçıları, artistları belän tanışıp, plastinqalar, albomnar cıya torğan bulğannar. Xäzer İlhan Sadri, Apaqaylar tuplağan cırlarnı zamança formatqa küçerep, yaña buınğa täqdim itä. “Min dönya xalqına tatarlarnı tanıtırğa telim, bezne belsennär, kürsennär, dim. Tatar xalqı tırış, matur, eçkersez. Tarixıbız bay, mädäniätebez iskitkeç. Ä aşlarıbız telne yotarlıq, şuña min bloğımnı “Pärämäç” dip atadım”, - dide İlhan “Tatar-inform” xäbärçesenä.

İlhan Sadri bloğında, tatar tamaşaçısına inde tanış retro sänğätkärlärneñ icatı belän berrättän, millättäşlärebezgä bilgele bulmağan yazmalar da bar. Mäsälän, İlhannıñ äbise Zöhrä Quğuşeva uquında Ğabdulla Tuqay şiğeren unikal' yazma dip atap bula. Bloğta şulay uq plastinqa-kassetalarnıñ avtoğraflı tışlıqlarınıñ räsemnäre dä bar. Mäsälän, cırçı Märäm Raxmanqulova, kompozitor Röstäm Yäxin Apaqaylarğa büläk itkän plastinqa tışlıqlarına teläklären yazğan bulğannar.

İlhan bügenge köndä tatar dönyasında barğan barlıq xällärdän xäbärdar. Ul tatar matbuğatın aldıra, tatar saytların uqıp bara, sotsial' çeltärlärdä millättäşläre belän aktiv aralaşa. Waqıtı tığız bulsa da, tuplanmanı tulılandıru eşen tuqtatmıy. “Soñğı tapqır mağnit tasmasınnan dürt säğätlek tatar kontsertın küçerdem, bloğım bik bayıdı, min moña çiksez şatmın. Alğa taba cırlarnıñ audiosın ğına elep qalmıyça, süzlären dä küçerep yazıp, bloğqa tuplap barasım kilä”, - dide İlhan Sadri.

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши