Mädäniyät

Tatarstannıñ Arça rayonı Saban tuyı izge doğa belän başlandı

Tatarstan Prezidentı da Arça Saban tuyında qatnaştı

 (Qazan, 5 iyün, "Tatar-inform", Arseniy Mawrin). Bügen Tatarstan Respublikası Prezidentı Röstäm Miñnexanov Arça munitsipal' rayonına eş säfäre qısalarında Saban tuyın bäyräm itüdä qatnaştı.

Qunaqlarnı mäydan qapqası töbendä çäk-çäk, başqa tör küçtänäçlär belän qarşı aldılar. Alarğa tübätäylär büläk ittelär. Qunaqlarğa ozın qolğağa sölge bäylärgä täqdim ittelär, häm Röstäm Miñnexanov ürnäk kürsätte.

Ğabdulla Tuqay tuğan töbäktäge Saban tuyı teatral'läşterelgän proloğ belän başlandı. Bıyıl ul tuuına 130 yıl tulğan klassiknıñ äsärlärenä nigezlängän ide. Saban tuyınıñ tantanalı öleşe isä izge doğa belän başlandı. Arça rayonı imam-möxtäsibe Rail xäzrät Ğiläcev Allahı Täğälädän xalıqlar arasında tınıçlıq häm Tatarstan cirenä bäräkät sorap möräcäğät itte.

"Bez çäçüne soñğılardan bulıp başladıq, ämma berençelärdän bulıp tämamladıq. Arça rayonında xezmät söyüçän xalıq yäşi", - dip bilgeläp ütte rayon başlığı İlşat Nuriev.

"Arça respublika tormışında härwaqıt ayırım rol' uynadı, - dip basım yasap äytte Tatarstan Prezidentı Röstäm Miñnexanov. - Bezneñ milli bäyrämebez Saban tuyı bıyıl dönyanıñ 27 ilendä häm Rossiäneñ küpçelek töbäklärendä bilgeläp ütelä", - dip, ul çäçäk atuların, Saban tuyınıñ yämle uzuın teläde.

Märtäbäle qunaqlar arasında – «Ğazprom neft» ĞAC idäräse räise, general' direktorı Aleksandr Dükov, «TAİF» AAC general' direktorı Albert Şihabetdinov, «Ğazprom transğaz Qazan» CÇC general' direktorı Räfqät Qantükov, "World Class" fitnes-çeltärenä nigez saluçı Olga Slutskyır, Tatarstan Respublikası Urman xucalığı ministrı Almaz Nazirov, Tatarstan Respublikası Arxiv eşe buyınça däwlät komitetı räise İrada Äyüpova, Tatarstan Respublikası Däwlät Sovetınıñ İqtisad, investitsiälär häm eşquarlıq komitetı räise Rafis Borhanov, «Tattelekom» ĞAC general' direktorı Lotfulla Şäfıyğullin.

Saban tuyında ozın häm şoma bağana başına menü ciñel bulmadı. Bağana oçına menep citkän İrek Däwlätşinnı Tatarstan liderı Röstäm Miñnexanov anıñ yanına kilep qotladı. Prezident sportçınıñ qaysı yaqtan buluı belän qızıqsınğaç, ul üzeneñ Tübän Qamada yäşäwen, qara-qarşı suğış sänğäte belän şöğellänüen, Arça Saban tuyına berençe genä kilüen söyläde. Röstäm Miñnexanovnıñ: «Xällär niçek soñ?» - dip sorawına İrek Däwlätşin, şäp, ällä ni zur bulmağan tırnalular-sıdırılular tiz arada tözäler äle, dip cawapladı.

Tatarstan Respublikası Prezidentı bağanağa menärgä omtıluçılar belän berniçä foto töşerde häm anı şunda uq alarnı Instagram häm «VKontakte» sotsial' çeltärlärendäge bitenä quydı.

Saban tuyı cirle ippodromda at çabışı belän däwam itte.

 

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши