Räsmi xäbärlär

Röstäm Miñnexanov: " Rus tele ul – Puşkin, Tolstoy, Dostoyıvskiylar tele – dönya külämendä kiñ yañğıraş alğan tel"

Prezident rus tele häm mädäniäteneñ Rossiäneñ küp kenä milli telläre üseşenä yoğıntı yasağanın assızıqladı

 
(Qazan, 6 iyün, "Tatar-inform", Gölnar Ğärifullina). Bügenge köndä rus tele – dönya külämendä kiñ yañğıraş alğan tel. Bügen Tatarstan Respublikası Prezidentı Röstäm Miñnexanov M. Cälil isemendäge Tatar däwlät opera häm balet akademiä teatrında Rus tele könenä häm böyek rus şağire Aleksandr Puşkinnıñ tuuına 217 yıl tuluğa bağışlanğan tantanalı çarada şulay dip assızıqladı.

Bäyrämdä Tatarstannıñ Däwlät Kiñäşçese Mintimer Şäymiev, TR Däwlät Sovetı Räise Färit Möxämmätşin, TR Prezidentı Apparatı citäkçese Äsğät Säfärov, TR Däwlät Sovetı Räise urınbasarları Rimma Ratnikova, Yüriy Qamaltınov, Tatiana Larionova, TR Premyer-ministrı urınbasarı Wasıyl Şäyxraziev, TR mädäniät ministrı Ayrat Sibağatullin häm başqa räsmi zatlar qatnaştı.

Tantanalı çara Puşkin çorındağı bal küreneşläre taswirlanğan teatral'läşterelgän proloğ belän açıldı.

Röstäm Miñnexanovka bäyräm qunaqların, rus tele belgeçlären häm telne söyüçelärne Rus tele köne belän ixlas täbrikläde, Rus tele köneneñ Puşkinnıñ tuğan könendä bilgeläp ütelüe simvolik buluın şärexläde. "Rus tele ul – Puşkin, Tolstoy, Dostoyıvskiylar tele – ul dönya külämendä kiñ yañğıraş alğan tel, millätara, mädäniara aralaşu tele, törle çorlar häm buınnar arasında totaştıruçı ber cep", - dip basım yasadı Prezident. Ul çığışında bilgeläp uzğança, xäzerge waqıtta rus telen üsterü ğomumdäwlät burıçları rätenä kerä.

Röstäm Miñnexanov bilgeläp ütkänçä, rus tele häm mädäniäte Rossiäneñ küp kenä milli telläre üseşenä, törle millät yazuçıları häm şağirläre, rässamnarı häm kompozitorları icatına zur yoğıntı yasağan. “Rus häm tatar telläre häm mädäniätlären özleksez ruxi bağlanışlar bäyli. Bezneñ burıç – respublikada unikal' tel häm mädäni küptörlelekne saqlap qalu häm arttıru”, - dip belderde respublika citäkçese.

Prezident Tatarstanda rus tele, mädäniäte häm traditsiälären saqlap qalu häm üsterügä yünälderelgän däwlät programması ğämälgä aşırıluın bilgeläp ütte. 10 yıldan artıq “Tatarstanda rus tele” programması ğämäldä, anıñ 2020 nçe yılğa qädär isäplängän çirattağı proyektın eşläw tögällänep kilä, yıl sayın distälägän rus etnomädäni proyektlar tormışqa aşırıla. R. Miñnexanov “Qarawon”, “Spas yärminkäse”, “Alekseyıvskie perezwonı” kebek çaralarnıñ zur populärlıq qazanuın bilgeläp uzdı.

Prezident äytüençä, cämäğätçelek wäkilläre, pedagoglar häm mädäniät xezmätkärläre rus tele häm mädäniäte üseşe buyınça sallı eş başqara. Tatarstannıñ Rus milli-mädäni berläşmäseneñ role zur. Röstäm Miñnexanov bügen şuşı berläşmä äğzaları belän oçraşuda kiläçäkkä yaña burıçlar bilgelängänen äytte. “Xäzerge waqıtta rus telen üsterü ğomumdäwlät burıçları rätenä kerä”, - dip assızıqladı Röstäm Miñnexanov.

Respublika başlığı ağımdağı yılnıñ oktäber ayında Qazanda Rossiäneñ rus tele häm ädäbiäte uqıtuçıları cämğiäte kongressı uzaçağın xäbär itte. Anda telne häm anı uqıtunıñ texnologiälären öyränü öçen şartlarnı kamilläşterü mäs'äläläre qaralaçağın äytte.

“Tellärne, mädäniätlärne, traditsiälärne saqlap qalu häm üsterü – bezneñ uñışnıñ, imin tormışnıñ nigeze”, - dide Röstäm Miñnexanov häm rus häm ädäbiäte üseşenä üzlärennän öleş kertüçelärgä, rus tele uqıtuçılarına, ädäbiät häm sänğät ähellärenä räxmäten citkerde. Annan soñ Prezident däwlät büläklären tapşırdı.

Tantana barışında Puşkin icatı ürnäkläre, anıñ çordaş şağirläreneñ äsärlärennän özeklär, başqa şağirlärneñ, şul isäptän tatar xalqınıñ böyek ulı Ğabdulla Tuqaynıñ, Puşkinğa mädxiä itep yazılğan şiğerläre yañğıradı.

Нашли ошибку в тексте? Выделите ее и нажмите Ctrl + Enter. Используется система Orphus.
    Опубликовать      

Поместите ссылку на статью в ваш блог:

Написать комментарий

Обновляется щелчком мыши